كنت قاعد أنا وصديقي الصايع مـــجودي نتعشى بفدركرز قبل أمس

كنا متفقين إن العشا قطّة لكنه مادفع غير عشرين ريال وأنا دفعت الباقي << داري إنك بتقول يلعن أم الذاكرة لكن قل ماشالله

وجالسين عند القزاز قاعدين نناظر البنات اللي رايحات واللي جايّات كلهن بالطعشات والمكياج يقوطر وكعوب شطولها وشنط بربري وجاعد ومدري وش هي الماركات

المهم شفنا بنتين ركبن الموتر وفيه واحد جينزه لنص الساق ماشالله عليه لكن الظاهر لابس جينز أبوه لأنه طايح وصرواله باين

يمشي وهو ماسك الجينز لايطيح ويروح عند البنات يتميلح عليهن ويستعرض بجينز أبوه

قلت لمجودي شف البنات هم اللي معطينه وجه ولا ماتميلح بهالجرأة

قام قال لي مجودي: لو إنّي مكانهم كان والله أهبّل بالشباب وأستانس وأوسّع صدري

وسألني: صح ولا لا؟ مو أنت بتسوي كذا؟

قلت له: ها؟ لا والله أنا بصير عباية على الراس وأدور الستر والعرس

قعدنا نضحك ونمش خشومنا وقلت له أنت يالبنت الصايعة ينفع شكلك بنت داشرة وقاصة بوي واسمك سمر

قال لي وانت يالعاقلة ينفع اسمك موضي

وأنا والله صادقة ، قصدي صادق

والله إني أدور الستر والعقل وش لي ووش للصياعة والدشارة وقلة الحياة ومكالمات الشباب اللي ماوراهم إلا الغثا وقلة الحيا

لا والله إلا لازقتن مع أميمتي من عرس للثاني ومن عزيمة للثانية لين أنخطب وأروح بيت رجلي معزعزة مكركرة

أما سمر الصايعة ذي اللي ماغير مطامر بحفلات الدي جي وبشنطتها ثمان جوّالات العنيد والنورس ورهيب 2000 كل واحد برقم

وتلبس جينز برمودا وتوب يبين الصرّة وطاقتن اللثمة وتخلي السواق ينزلها بمملكة المرأة وثمّن تنزل للمملكة وتركب ليموزين هي وصديقاتها الداشرات عشان يروحن للفيصلية ويجمعن أرقام بالطريق

وتكلم خالد عشان يدفع لها حق الشنطة القوتشي وتكلم فيصل عشان يدفع لها حق الساعة الشانيل ووليد عشان يقص لها تذكرة باريس وفي الأخير يجي برجس يفضحها باليوتيوب ولا تلقى لا خير الدنيا ولا نعيم الآخرة وش بتستفيد ها عرفتوا؟

لالا أنا مالي بهالخرابيط..

سمر يالداشرة لاعاد تكلميني

عزيزي الجنط .. عزيزتي الجنطه

لو إنّك جنط .. ولو أنّك جنطة .. وشلون بتصيرون علموني؟