يقدر السمينات

يوم كنا صغار ، نشتري ببسي بريال يقولون ليييييه ورا ماجبت العائلي ..نشتري خروف يقولون ليييييي ورا ماجبت اكبر .. نشتري تفاح بالكيلو يقولون لييييييه ورا ما جبت كرتون .. نشتري كامري يقولون لييييييه وراك ما شريت جمس .. اللي فهمته إن الكبير أزين من الصغير وان المتين أزين من النحيف .. نعم أنا ضحية رسائل مرروها أهلي لعقلي طوال عقدين من الزمان ...

فتيات أحلامي ... زي كل شاب لازم أمر بفترة المراهقة وكل الناس كذا باستثناء أمي وأبوي يقولون إنهم كانوا أطفال وكبروا وصاروا راشدين على طول ما مروا بفترة مراهقة طبعاً يؤسفني إني أقول إن أهلي كذابين نعم أهلي كذابين وأنا ولدهم فأكيد إني أنا برضه كذاب .. إلا في شي واحد عشقي للسمينات والمتينات وادوخ ايما دوخه عند المربربات هذا صدق ما فيه جدال..

زمااان أيام ما كان محمد عبده طاق تسعة ازارير في الياقة وشعر منصور مفتاح كنه عرفجه كانوا أبناء جيلي مفتونين بعلا رامي وأختها بسحر وأنا الوحيد اللي شايل صورة وفاء مكي قسم بالله اهل وفاء مكي ما شالوا صورتها وانا شلتها .. ويوم دخلت وفاء مكي السجن فكرت اشيل القضيه عنها واروح للنائب العام في دمنهور واعترف ... لحمه بيضا اختصاراً للوقت .. حرمه صدقيه .. عندي اعتقاد الى درجة اليقين ان الحرمه ما تكتمل أنوثتها إلا إذا صارت زنودها مثل زنود محمد علي كلاي تملا حياتي وتملا بيتي وتملا السرير .. تحس معاها انك مع حرمه اكره النحيفات احب الحرمه اللي جسمها مثل الطماطه الخربانه مثل مسحب الدجاج لو تحط إصبعك في بطنها طلع مع ظهرها ما فيها عظام .. حرمه وأنت معاها سكرت باب الشرع وكأنك ماخذ اربع..

أما النحيفة اللي مثل شايب .. كلها عظام وعروق ماابيها ما ابيها ..ويوم طحنا في الدشوش انهبلوا العالم عند هيفاء واليسا و.. و.. وانا بغا يغمى علي يوم شفت كلوديا الشمالي خصوصاً اذا كشفت عن كتوفها وقالت طلبت الألب عطيتك ألبي .. لكن ما فيه قناه إلا وحاربتني عليها واختفت والله عوضني خير وجاءت عنق الفقمة وحفيد سيد قشطه .. ديانا كرزون .. صوّت لها لين بغيت ادخل السجن من الديون .. وبكيت أكثر من امها يوم فازت ولأني من فئة (انزه في روض المحاسن مقلتي ... وامنع نفسي أن تنال محرما) قررت اعرس.

أنا وشبه القارة..

أمي برضه قررت تخطب لي بنت سمينه ما هوب علشان هذا طلبي ... لكن عندها يقين إن البنت السمينه اللي شعرها طويل واسود جيده في شغل البيت والحمل والولادة امي تبغا جاريه وانا ابغا زوجه .. اتفقنا في المواصفات واختلفنا في الاهداف .. كانت الشريحة المستهدفة هن البنات اللي من وزن (100 الى 150) ماااااش هذا وزن الذبابة أبي وزن الفقمة..

دورنا يمين شمال الين جاءت وحده من خواتي من أقصى المقلط تراكض .. أبشرك أبشرك .. يقولون لنا بنت عم في القرية ما لقوا ميزان ياسعها وعطتني معلومة كانت كفيله باتقاد شرارة الشوق في قلبي الفتي .. البنت من شدة سمنتها ما مشت إلا في سادس ابتدائي..

رحنا الديره وخطبناها وبكا ابوها يقول ما نيب مصدق .. وامها حبت راسي ويوم جت تحب ايدي سحبتها وأنا أقول استغفر الله أنتي زي امي .. تعال بكره شف العروس .. اوكي .. بكره بكره .. يقولون عيارتها شبه القاره لأنها مترامية الإطراف وأنا أقول القمر ما غاب .. وجرى الدم في عروقي والتهبت مفاصلي شوقاً يوم قال أبوها البنت سمينه ولا تقدر تدخل عندك المجلس خل الشوفه في مصلى العيد في البر .. الف مقوي مايسوى اللي سواههالخبر انهبلت وغديت كنى على حامي المليله .. اخيرا اخيرا .. يا شيخ خربوا البنات من تالي رجيم وسناك وقلة حيا ايييييييييه هذي الحرمه شبه القارة لبا قلبها..

انتظرت في مصلى العيد واقبلت سيارتهم.. فيه هاله حول السيارة تفضح البدر اللي داخلها .. الشكمان ريحته عطر .. سويت نفسي برستيج ورحت افتح لها باب السياره لقيتهم شايلن المراتب وحاطين جلسه عربي ومركا تقول كنهم في مجلس موب سيارة وسحبنا البنت بواير وطلعت ... يا شيخ يلعن أم الووووووصف اللي قال شبه قاره جابها .. البنت مترامية الأطراف إلى درجة إن حرارة الطقس عندها تختلف لابسه من تحت صيفي ومن فوق شتوي .. البنت تعدت مرحله اللحمه ودخلت في مرحله متقدمه من الشحمة .. ما راح أوصفها لكم يكفي تتخيلوا جمس ابيض وعلى الصدام شوية روج بالضبط هذي هي البنت من الخجل دخلت عرض في السوالف .. قالت تصدق انا مولوده خديج قلت وشلون يعني قالت مولودة في سبع شهور موب تسعه قلت وانا اتميلح لا تشيلين هم بكره اروح للأمير محمد واطلبه راتب الشهرين اللي طافتك قلت في نفسي يلعن ام الحاله يعني لو كملت الشهرين كان فوق هالجمس كورلا بعد .. قالت انت تدرس والا طالب قلت لاهذي ولاذيك توني في الجامعه وضحكنا .. انا هههههه وهي خأخأخأخأخأ..

رمشت بعيونها في دلال الين عجعج الغبار حولنا قالت سمعت انك مسوي دون جوان في الخبر ومهبل ببنات الصن سيت .. قلت عاد هذي مبالغه مو كل بنات عليشه بس بنات كلية التربيه بس .. ههههههههه و عخأ عخأ عخأ عخأ ... قلت على فكره ضحكتك سبشل قالت مادري بس كلهم يقولون أزين ما فيك ضحكتك ...

طبعاً أبوها وأمها وقت الشوفه صدوا بعيد يقولون على ايش نغار .. انتهت الشوفه وقبل امشي عطتني ورقه وراحت تطعس الين وصلت السياره .. كاتبه في الورقه .. وان كان جسمي كبير..قلبي اكبر ويشيل مثلك عشره..اسيرتك/امتثال....حلوه يشيل مثلي عشره البنت صايعة..قلت مسكينة خانها التعبير.

من بكره كلمتها بالتلفون >>>>>نحسبك كلمتها بالمايكروويف .. وسألتها من عرض السوالف ليش وزنك بزيادة كذا .. تحشرج صوتها وتهدج وقالت ما خليت دكتور في الديره ما رحت له (على فكره كل الديره ما فيها الا دكتور واحد باكستاني جاي بفيزة سباك) ايوه اسلمي وش قالوا قالت يقولون عندك مرض نادر يصيب شخص واحد من كل مية ترليون شخص اسمه نذالة المعدة قلت وش ذي نذالة المعدة قالت إن المعدة عندي فيها نذالة إذا أكلت لو زيتونه تصيح المعدة وتقول كبسه جريش مرقوق يقومون الإنزيمات يصدقون ويدهرون إفرازات وذا المرض اسمه العلمي ( معده بوعمااار) قلت وانا اخفف عنها نذالة موب نذالة حبيتك بكل ما فيك من شحم ولحم .. وش رأيك نتزوج الخميس الجاي قالت اوف الجاي طيب قل في الصيفية قلت ودي بس ما ودي أبطي على القرّاء ودي نخلص الموضوع بسرعه .. قالت تم .. قلت هاتي بوسه قالت امووووووووووووووخأ خأ خأ خأ خأ.

جاء المأذون .. سألت ابوها كم المهر قال يابوك بلا مهر بلا هم خل الدراهم معك تنفعك في مصروفها .. المأذون عيا يكتب يقول إن الشرع حلل اربع وانت بتعرس على وحده عن خمس يا شيخ يهديك يرضيك قال ابد أنت متعدي النصاب .. البنت معاها عم عصبي قام اخذ سكين وراح للبنت شوي وهو جايب شوي من كتفها قال هاااه يا شيخ والحين قال الشيخ اوكي بيبي ناو وي كان دو >>مأذون من الحزب الجمهوري.

أخذت شبه القاره وجينا بنركب السيارة حاولنا نعفطها يمين يسار مااااش عيت تدخل قامت امها جابت نيفيا ودهنت كتوف البنت وحشرناها في السياره وصلنا الفندق ماطاعت ترقا الغرفه حطولنا خيمه في البهو ودخلنا .. هنا بيت القصيد..

بعدين الباقي مشفر لوجود اطفال في المنتدى ومغاتير