السلام عليكم .. مساء الخير اخواني المناضلين واخواتي الماجدات

يسعـد ( مسائكم ) . أو . ( صباحكم )
كل الشكر .. لإدارة المنتدى من اصغرهم لإكبرهم كما لا انسى ان اشكر كلاً من

عبيد ابو جبهة

حمدان ابو صنقر

دحيم ابو ركبة

عمشى العرجا

أبو قاحز ولا خلا ولا عدم واللي فسح لي المجال (أنزلو تحت وأنتم تعرفون ) <=

وكل افراد عائلة ( ما حولك احد )

< أنا متأكد من أن البعض ألآن ينظر لي بنظرة غريبة ومعناتها (( وش يبي ذا الحين )) لكن وبماأني هادي وحبوب وأتقبل النقد كما أتقبل المدح أبسوي نفسي كني ماادري .. { يعني أبمشيها هالمرة }

قد يستغرب البعض أيضاً من النك نيم تبعي والبعض يقول بينه وبين نفسة أول مرتن أشوف هالآدمي وش عندة و و و .. ومن هالهكلام ..

وماودي أطيل عليكم بالهرج أعزائي .. وبالنسبة للسبب اللي خلاني أنزل موضوع .. أهو نقاش بسيط دار بيني وبين ألآداري ألانيق ومشرف القسم أبو قاحز وعلى أثرها ألان أسدح قوصة {من وحيي الخيال } وتعتبر القوصة هذه جزء صغير من مدوناتي أو بشكل أوضح أهو جزء صغير من مواضيع يومياتي بأسم (( كشتاااااات )) ..

أنا راح أترككم مع القوصة وأذا لقيت تفاعل من قبل ألآعضاء راح تكون هناك كم هائل من كتاباتي المحفوظة بملفاتي الشخصية ..

(( مدخل ))

لا جديد في اسواق البورصه الدولية .. جالس بالملحـق ومن زود الفضااوة شاب الضوء وآكتب مرثية اللتي لطالما تمنيت في يوم من الايام ان فنان العرب مزعل فرحاان يغنيها ويشدو بها على صوت الطرب الاصيل ,, وبينما انا غارق في كتابة المرثية الا وتروح عيني للجريدة والمّح فيها خبر سد نفسي وخلاني اطفي النار بركبتي ( لا احد يقولي انت نصااب ,, لاني ابرصه بركبه اطفي الفضولية اللي عنده ) قريت بالجريدة مكتوب .. حكومتنا الرشيدة تتبرع بمبلغ وقدره .. [ للاسف حاولت اجمعه بحاسبة الكمبنوطر ] .. ردت عليّ الحاسبه بكل هدوء . وقالت ( ارحمني يا شيييييييييخ ) .. قلت بيني وبين نفسي يا حكومتنا الله يهدااااتس تبرعي لي بخبز وجبن لاني متلّوي من الجوع تقول سيلاني ممحوطـ(ن) على بطنه .. بعد ما قريت الخبر قمت اتسدح واتخيل كعاادتي .. مراات اتخيل اني ولد هوااامير وماسك بيدي قطو شيرازي وقاعد احكحكه وأنا حاطة على صدري ، ومراات اتخيل ان الفيصليه لي ومرااات اتخيل ان الرياااض كلبوها لي .. ومراات اتخيل اني راكب سيارة فخمه .. يوم تخيلت اني راكب سيارة فخمه انقطعت عندي حبل الافكار وتذكرت اني مشغل سيارتي لاني بروح للمطعم .. ركبت سيارتي وطياره لاحلى مطعم .. دخلت المطعم طلبت دجاجة على الفحم ورزّ بخاري ( اكيد ماهو ابو كاااااس .. ) رحت لليماني ابحاسبه ويوم دخلت يدي في ( مخباااي ) الا والله اليماني بيده مبلغ من المال وقدره ( اضعاااف تبرع حكومتنا الرشيدة ) انا سويت نفسي ماني مهتم لهالمبلغ .. وقلت عجّل علي يالحضرمي ,, انت الظاهر اول مرة تجيك فلوس ومطلعها لكل وااحد ..

رجعت البيت وفرشت السماط كما يفرش الملك مملوكه على ايام عبدالملك بن مروان ( يا مال الجنه الباردة يابو مروان ) ضبطت الدجاجة والرز .. ويوم جيت اباكل انسدت نفسي ودفيت الصحن بركبتي ,, {الكل بيسئل ليش ما تاكل }.. السبب " اللي يبي الحلو يصبر على مرّه .. انا نويت اسرق المطعم .. ايه بسرقه ليش مستغربين مني ..؟ والا اول مرة تشوفون حراامي محترم مثلي .. يعني وش ترجون من واحد مسروق منه خمسين ريال ويصرفون له حبوب مهدئة من احد العيادات النفسيه ,, والله لو انه ابوي لاسرقه واقول له من انت ترى ما عرفتك ؟ ولآ.. فوق كذا ابقول الظاهر انا مشبه عليك ( قد ) شفتك بتوقيف شرطة النسيم بقضية ......!! (( نكب عفش ابوه ))

يوم خشت مزاجي هالفكرة .. قمت أقرط بأظافريدي ,, كناية عن التفكير العميق ,, وبعد عمق التفكير قررت اني اسرق المطعم ولا اخلي علي اي دليل علشان ما اروح غلطه عمر .. تذكرت ان المطعم قدامه .. بوفيـة تسـالي .. فاستغليت هالشيء ولزقت لزقة في التسالي كل شوي جايهم وطالب محلي ( يعني ما اعرف شيء اسمه سفري ) واستغل فرصه تواجدي بالمطعم علشان اسجل ملاحظاتي على المطعم .. يعني نقاط الضعف .. نقاط القوه ,, بابهم حديد عاادي والا الكتروني .. قفلهم ابو دواير والا القفل الجديد .. " اكيد بعضكم بيقول والله لو انك بتسرق بنك ساااب " .. الجواب .. المبلغ اللي وقدره ( 000 ) اكبر من سااب والاهلي والراجحي ولا تنسى تخلي السعودي الهولندي كومبارس .. يعني الفلوس اللي انا شفتها ,, اكثر من حواجب " الممثل السوري .. دحومي ال رشي " واكثر من حواجب وشعر صدر باكستاني ساكن في كابول :) < يبي يقول أفغاني بس توهق :( ..

خليت بوفية التسالي مركز المراقبة الرئيسي والفوال اللي جنبه فرع للمقر الرئيسي .. شريت لي كرسي اللي تنزله وترفعه ويتحرك بطقة اصبع وخليته برى بوفية تسالي وشريت لي نظارة ( صايرن تقول قعيس محتفل بعيد الحب ) .. المهم كل شوي جااي للتسالي ومنزل الكرسي من دبة السيارة .. واقعد اطلب لي ببسي ومراات مويه .. المهم من كثر ما طلبت بطني بغى ينفجر ويخلف له اكبر عملية ارهابية بعد عميلة تفجير مجمع المحيا .. قعدت على الكرسي وعين تطالع المطعم وعين على الناس .. وقمت اسجل ملاحظاتي على المطعم .. اليوم اللي فيه زحمه .. متى الوقت اللي يكثرون فيه المشافيح .. اليماني متى تندبل تسبده ويترك المطعم ويغير له جوّ .. الناس تحب تاكل سفري والا محلي .. على سماط والا على صحن .. يحبون دجاج شوايه والا على الفحم .. وانا غاارق بالتسجيل لقيت لي اكبر نقطه ضعف .. لقيت الحضرمي يترك نعوله اذا جلس على كرسي المحاسب .. وانا اؤمن بالمثل اللي يقول ( الصغير يسحب الكبير ) فسجلت هالملاحظه على مرتبة السيارة علشان ما انساها .. رجعت للبيت .. لقيت العيال كلهم بالمجلس اللي يلعب بلاستيشن واللي يلعب ورق .. واللي قاضب الزاوية ويقعد يحل الكلمات المتقاطعه .. خشيت عليهم وانا غارق بالتفكير .. وقلت بكل هدوء .. واحد دجاج على الفحم <<< الله ياخذ نص وجهك يالحضرمي
الكل قط له كم ضحكه الا واحد .. قال لي بكل هدوء .. اللي خذا عقلك يتهنابه
قلت له بكل عنف على شحم وكمل لعبك قبل لا اطردك :(

رحت للسطح ومعي دفتر ابو 40 .. وقمت اخطط المطعم .. وكل شيء كتبته .. حتى اسحب وادفع اللي على الباب كتبتها .. علشان ما اضيع اذا سرقت المبلغ وادخل دورة المياه .. المهم انتهيت من مرحلة التخطيط المسبق لعملية السرقه .. سكرت الدفتر وربطته بحبل ابو دعسه وعلى باب السطح وقمت اتخيل الحضرمي والمبلغ اللي معااه وانا اتخيل سمعت لي صوت انفجاار .. قلت يالله سترك لا يكون الحضرمي درى اني ابسرقه وفجر المطعم علشان ما اسرقه .. ( تغدا عليّ قبل لا اتعشى عليه ) .. قمت مفزوع وجيتك مااشي مليون للمطعم .. ومن زود الطفاقه عندي طلعت للشارع ما عليّ ثوب .. وبدون نعول وقبل لا اوصل للمطعم اشوف الناس متناثره هناااك واللي قاضب الاشاره وينتفض واللي قاعد يدور جواله وشماغه .. وادعس زياااادة واحط رجلي ابشوف المطعم صار فيه شيء والا لا .. يوم وصلت هناااااك ,, الا والله اسمع صوت الناس وين الطلب يا صديق .. عجل علينا .. والله لو انك تسوي القنبلة الذريه امدااك خلصت ..

انا ما عليّ منهم !!
اهم شيء الحضرمي لا يصير فيه شيء وتروح حياااتي خساااره ؟ << صرت احبه
يوم اقبلت على المطعم الا والله اليماني قاعد على الكرسي وما حصلت نعوله تحت
قلت افى الحضرمي شك !! اخخ يالقهر بس
ما امداني قلت اخخ يالقهر .. الا ويجي هندي ويقعد ينفخ على الحضرمي وهو يقوم الحضرمي متنرفز وقافلتـ(ن) معاااه .. ويمحط الهندي بنعوله !!! على خشمه
انا اخذت لي خمس دقائق واطالع بالنعول .. قمت اهوجس لا يكون مغيرها بس !!
يوم فتحت عيوني اكثر الا والله النعول هي هي ما تغيرت .. سجدت لي ركعتين شكر لله .. ورجعت للبيت طيااااااره وسيييييييده للمجلس .. وامحطها نومه ما صحيت الا الساعه 2 الظهر .. يوم صحيت الا وجهي صايرن تقول مخرووووش .. قلت لااا وجهي ما صار كذا الا الحضرمي صايرن فيه شيء .. وبسرعه الحسن كيتا وصلت للمطعم !!
يوم وصلت للمطعم الا والله مسكر .. ومحطوط فوق القفل ( مغلق من قبل البلدية )
قلت يلعن مزحك يالحضرمي !! شكل مالك خلق للشغل اليوم والا الظاهر الحضرمية مقفله جوالها او متهاوش مع امه .. وماله خلق يفتح !!

وشوي ويمر جنب المطعم هندي عليه وزره وريحته تسبب لك شلل رباااعي

انا : صديق وين مطعم
الهندي : اليوم اجي نفر وسكر مطئم وشيل نفر كلوو :(

اصدق .. اكذب ,, لا لا مو معقول ’’ يمكن مضيع .. والا الظاهر الحضرمي رايح لدورة المياااه .. المهم ويجيني الخبر الصااااعق ان المطعم مخالف للانظمه والعماله اللي فيه جايين بفيزة سباكين !!

رجعت وانا ( مدنق ) راسي كناية عن الذل والخسارة .. واشوف لي قطو قاعد يطامر فوق جدار بيت جارنا .. قلت اخخخ ليتني قطو بس
رحت لسيارتي واقعد اتسدح فوق السيارة .. واقول ’’ ميوووووووووو ميووووووو .. ويجي اخوي ويسحبني من فوق السيارة ويرفسني ذيك الركبه مع كم كلمه خارجه عن الادب العام !!

رحت للمجلس ,, وتذكرت قول شعبان عبدالرحيم

ليس الفتى من يقول كان ابي .. ان الفتى من يقول ها انا

The End

من مذكراات مدمن دلآخة (( باب ماجاء .. كيف تفتخر بدلآختك )) !!

حيث يقول ..

اذا كنت ناوي تسرق تاكد ان قلبك موجود .. وحاول تسرق الشيء اذا كان الشارع اللي حول المكان مزحوم بالناس .. علشان تبعد الشبهة عنك

ما يستفاد من الموضوع

- التخطيط المدروس .. اقرب وسيلة للنجاح
- الدجاج على الفحم .. احسن من الشواية

خارج الموضوع

- مبروك لـنا جميعاً على الستايل الحلو ..

- يا كثر الاعضاء اللي يجوني ويقولون وش قصتك مع ( أقسام المنتدى ) السبب ’’ لاني بااارد وكسول وغير متواصل مع الاعضاء .. يعني لا احد يفكر تفكير سطحي ويعتقد ان مدمن دلآخة بينه وبين الاداره أو المنتدى بكبره خلاف .. لا بالعكس كلهم حبايبي بس الغلط مني .. وماهو غلط بقد ماهي ظروف تواجهني .. واهم شيء اني اتواصل معاكم من خلال مواضيعي ..


(( قفله ))

أتمنى أني ماأثقلت كاهلكم بكثرة كلامي وخيالاتي ولاكن رغبةً مني أن أضع ألآبتسامة زائداً الخيال مع الهدف اللذي نسعى ألية كي نجعل من القاريء يفتح ثمة ويستفيد ويتحمس للقرائة والبعد عن الملل :)

مودتي / مدمن دلآخة