ألفيه بن عمار
السلام عليكم و رحمة الله و بركاته

هذه قصيدة الألفية للشاعر / محمد بن عمار (رحمة الله) قالها عام 1340هـ



ألفٍ أ ولف من كلام ِ نظيفي
ودموع عيني فوق خدي ذريفي
من لام في حب الحبيّب وليفي
دقاق رمش العين سيد الخوندات
خوندات ياللي ما بعد عاشرنه
قلّه تراهن في الهوى يذبحنه
قلبي وقلبك من عروقه خذنه
عزي لمن مثلي تعرض للآ فات
الباء بليت بحب خلي على ماش
ولاحصل لي منه ما يبرد الجاش
غديت أنا وإياه طاسه ومنقاش
بالوصف كني يالمعزي سلامات
سلامات للذي هم يذكرونه
يبي السلامة منه وهي المعونه
يقول طيب مير غارت عيونه
سبب ولدكم واحدٍ صابه ومات
التاء تليت الزين والزين مقفي
أمشي وحتفي ناقله فوق كتفي
لاشفت مجدول وكتفٍ ورد في
ماقوى التفت لو طوحولي بالاصوات
أصوات وإن قالواهبيل ٍ وسايح
طرد المقفي يالمشقى فضايح
قلت إيه مير أشواركم والنصايح
مثل المطر فوق السحال المكفات
الثاء ثمانه حب رمان طايف
أو قحويان ٍفي رياض ٍعطايف
متنقلٍ بالزين سيد العفايف
عمهوجة ٍفيها من الحور شارات
شارات فيها من ظبي الحمادي
هي لذة الدنيا وغاية مرادي
من يوم قفا صاحبي من بلادي
عليه جاوبت الحمامة با لاصوات
الجيم جاني من عشيري كلامي
ولا لقـيـنا من يـرد السـلامي ِ
عليه زرع القلب هايف وظامي
مالي جدا كود البكاء والتنهات
أنهت على ما فاتني في زماني
يوم الحبيّب زارني في مكاني
وراي ما خذت القضاء يوم جاني
توي دريت البيض فيهن غرّات
الحاء حليّه في الوطن ما لقيته
عذلت قلبي عنه ولا قويته
وهو لو يذكر يم *مسكه نصيته
أنصاه لو دونه بحور ومسافات
مسافات لوهي في بحور الظلامي
أو وسط بتّيل ٍ* حداه الولامي
وإذا حصل شف وبلوغ المرامي
صبرت لو طبيت بحر الظلامات
الخاء خليلي صار عندي قريبي
جعلي نصيب ٍله وهو من نصيبي
ودي نواجه نور عيني حبيبي
مار الوحيد لهيد ما فيه نوهات
نوهات نوهات ٍغدت من غثا البال
طول النهارمسِيم عمّال بطّال
وأنا أترجى كل حول ٍ إلى حال
دنياك هذي ياريش العين نشبات
الدال دامي ما مسكت الذوايب
لوقيل طيب قلت ما نيب طايب
دنّوا أستاد القبرأدنوا النصايب
ودنّو دواة الحبر نكتب سجلات
سجلات أريد أكتب بها لي وصيّه
عمري قضى يا وجد أهيّلي عليّه
قولو لصافي اللون ياقف عليّه
أغديه يرجع وايتحّسف بما فات
الذال ذا لي عنه مدة ليالي
لو قيل طيب قلت أنا أبخص بحالي
والله ما يطري علي شف بالي
إلا أنت يا راعي ألثمان الرهيفات
رهيفات فيها للمشقى طرابه
مجمول مدلول ٍ ولا به طنابه
هني من يدخل في ثيابه
وأسّج أنا ويّاه في العمر سجّات
الراء ردوف صويحبي ثقّلنه
ونهود للثوب الحمر شلّعنه
ومثومناً ٍ ما أحلى بياضه ودنّه
من فوق جسم ٍ فيه من عرق الأرطات
أرطات غرمول ٍ ذرته الذواري
والله لولا ني على الترف أداري
لأضوي عليها مثل ذيب الغداري
جايع وفي ا لغابه عياله مجيعات
الزاء زماني شفت منه الهوايل
لاعاد حظي في الغنادير مايل
الزين لو نترك قصير ٍ وطايل
لاشك وين العقل هيهات هيهات
هيهات لوفي العقل يا ديب لبّه
ما كان يتبع واحد ما يحبه
ليصار قولي له خريطٍ بدبّه
وش لك بشوفه يا العيون المشقات
السين سقنا من الدراهم وعيّا
واللي نبي من صاحبي ما تهيّا
يقول والله لو تحب الثريّا
خذني على السنة تشوف الطرابات
طرابات ينسنك جميع الدروبي
أغديك في باقـي حياتك تتوبي
وأودع مقرك بين جلدي وثوبي
وتشوف فرق البيض فيهن لذات
الشين شـاب الرأس يا عذب الأنياب
واللي بطاري توبة ٍكان قد تاب
لي حاجةٍ يا زين بس إفتح الباب
يرحمني اللي عالم ٍ بالخفيّات
يرحمني إني فيك يازين مفتون
من حبك أسهر والخلايق ينامون
الهيتني عن مذهب اللي يصلون
ما عاد أميّز لو قرآن التحيات
الصاد صيدي يوم ألاوي غريمي
شفق ٍعلي ألحبه ولمس البريمي
ما هوب صيدي قلةٍ في الحريمي
لا شك كل ٍله مع الناس مش هات
مش هاتي أنته يا ظبيّ الفريدي
حب العرب ينقص وحبك يزيدي
لا شفت زولك ذاك هو يوم عيدي
تصبح بساتين الضماير مريفات
الضاد ضد ٍ حال بيني وبينه
يقول هذا واحد ٍلا تبينه
جعل الوجع يشقيه في صبيّ عينه
يسهر ولا يمرح من الليل ساعات
ساعات جعله ما يشوف الجدار
ولا يعرف الليل هو والنهارا
عساه يـوم البعث يحشـر حمار
ويحمّلونه حمل الأسـراف سيئات
الطاء طويت اليأس والسد باحي
وما عاد لي شفٍ بظبّي الضواحي
يا علها هفّت خفوق الجناحي
اللي سبوقه فوق رجله مطوّات
مطوّات وطار في يوم هبّه
راعيه لو رز اللواء ما ينبّه
طيرٍ قضيب أو الحباري غدت به
يبي العشاء من بين فخذٍ وثنّدات
الظاء ظمانه لا تعاشرلك إثنين
لازم تخلىّ عشرتك يا مسيكين
صقلات يصقلها إلى أ دنوا طعامه
يجي لها مع المعيشه بحامه
إسمع كلا مي يالهبيل الفدامه
إلى جمعت الحصن فالحصن خطرات
العين عمّن ينقل الهرج حذراك
تراك كنك ناقل ٍداك برداك
وإلى سمع له هرجة ٍ من حكاياك
يحطها كبر القصور المبنّات
مبنّاة مبنّاة كبر خشم الغرابه
ويكدّر المشروب عقب الطرابه
وهو يشابه بومة ٍ في خرابه
لا ناقل الهرجه ولا كفو هرجات
الغين غاب العقل بأول شبابي
وأدميت من تلعات الأرقاب نابي
واليوم شاب الرأس والكيف طابي
ماني على الفايت كثير الحسوفات
حسوفات لاتحزن على اللي مضى منك
أيضاً ولاتفرح على اللي يجي منك
ماأدراك وش موجب سبب صدته عنك
ناهيك والي العرش رب السموات
الفاء فؤاد ك لا توليّه حسّاد
وإحذر يجي لك مع هل الشر مقعاد
إهرج وكنك عن جميع العرب صادّ
ثم إعتبر بالذيب يضوي بغرات
يضوي بغراتٍ وهم ما دروا به
واللي يوقف في المحاري هقوا به
كم واحدٍ وقّف ولا قضي نوبه
يهوي إلى شاف اللحم كنه حدات
القاف قل للي يريد النواميس
اللي يبي طرق الهوى يرخي الكيس
وإلا بذلت النفس والكيس وإبليس
يطيح ناس ٍيدّعون الديانات
طاحوا وصاروا للخلا يق علاجه
يلقى بهم راعي الهوى قضي حاجه
وإلا نثرت الحب جتك الدجاجه
حاضت وباضت لو تبي عشر بيضات
الكاف كنّ السدّ في كل الأحوال
وإحفظ لسانك لايقولون ذا قال
حتى تجي عند العرب خوش رجال
لا جيت مجلسهم نواظرك صقرات
صقرات لا تجلس مع اللي يشاكيك
هو داء دواك وتحسب إنه يداويك
ياديب كان الله على الرشد هاديك
إكتم كلامك بالضلوع المحنّات
اللام ليت العمر ينكس لحلّه
قيمة ثلا ثين السنة هي محلّه
الرجل قبل الشيب يا حلو دلّه
ولا لاح فيه الشيب ما فيه لذات
مافيه لذات ٍولا يرغبونه
لو حط له ردن ٍوكحل عيونه
أهل الهوى عقب الغلا ينكرونه
لوهو مصافيهم على فايتٍ فات
الميم ما غيري من الناس جرّب
ولاهو بمثلي في حياته تطرّب
لاويت صافي اللون فوق المضرّب
كن العدو عني عيونه مداوات
مداوات جعله ما يجي لك عباره
واللي بصد ٍعنك وش لك بكاره
الحذ رما ياطا بوسط ا لخباره
لازم يجي فيها عقارب وحيات
النون نام الحظ ولا فيه حيله
عيا يباريني وأنا أزريت أشيله
من يوم فارقني عريض الجديله
قام ايتكسر في حشا الصدرعبرات
عبرات ضيّقن حنايا ضلوعي
عليك يا خلي حسين الطبوعِي
واللة ما جفت محاجر دموعي
دايم عيوني في مهاواك سهرات
الهاء هواي السابعة يالفطيني
والثامنة ياللي تعرف الرطيني
مخفية ما ودي لضدي يبيني
والتاسعة تحصاه بأعداد الأميات
أميات مات القلب من كثر همّي
وأشكي عليك الحال يا ولد *عمي
أنته عضيدي وأنت لحمي ودمي
ترضاه يجفاني ولاني بمجفات
الواو ويل أهل الهوى من هواهم
كان الذي قد سم حالي وطاهم
كم ليلة ٍيصبح غبيبٍ عشاهم
إلا لقيمات ٍمع الحلق مّرات
مّرات لين أقضي من الترف شفي
وأوسده عضدي وزندي وكفي
وأكشف عن اللي بين ٍ وأمتخفّي
ثم ٍيجي للزاد والشرب لذات
لملف حبه صلف ومراقده كلف
لو هو يتمم مطلبي كان أقول ألف
حيثه صديق ٍمن قديم ٍعلى عرف
وإلا فغيره لو يبي عشر بيزات
بيزات ما أفّلها لغيره بلا شي
من جنس رأس الظبي ما أبي عراشي
إلا لمن ما يه على ماه ماشي
هذاك من يمه فلوسي رخيّات



مع التحيهـ..