هلا

هلا هلا
هلا باللي سبى قلبي

واخذني حسنه بقوه

سلب روحي واخذ صبري وانفاسي من ايديا

احس انه لعب بالقلب لعبة شاطر ومووه

يبعثرني ويجمعني رجا واحلام ورديه<<<<<ياشيخه ارحمي نفستس شوي :ma:


جريتكم بالعنوان صح
شسوي احبكم :36_3_16:


سلخير لكل الغالين
بصراحه انا زعلانه عليكم كلكم:oh:
درينا انه عيد وعايدنا وخلصنا عاد وشو له كل هالتغلي والا بتشوفون غلاكم عندي
يعني يرضيكم اجي كل يوم واوقف على اطلالكم واقرا مواضيعكم وردودكم القديمه واجر هاك التنهيده من اقصى معاليق قلبي :خجلان:
عساي مافقدكم من شر
والله لكم وحشه قسم الله لايحرمني منكم:36_3_15:

عاد شسمه
قلت يابنت ادامتس تحبينهم هالكثر شرايتس بدل ماتقلبين عويناتس بهالمواضيع وتحدثين الصفحه كل شوي تصيرين حرمتن سنعه وتضبطين لهم موضوع حليو وو تستقبلينهم فيه اذا رجعواclap:
والله وماردني الا مربع (موضوع جديد)مير وارعصها وادخل على هالصفحه واطلق لقريحتي العنان:bi: واقول ياربي وش اكتب وش اقول وشلون ابدا :g:
الايوم قالت لي الصفحه الحين وش تبين انتي وخشتس عندتس شي اكتبيه والا اقلبي وجهتس
قلت وجع لاتنفخين الا بكتب اصبري اجمع افكاري منا ومناك عطيني فرصه الله يعافيتس مير وترحمني قالت خلاص ياحبيبتي:inlove: خليتس فاتحتها الى باتسر الصبح:bi: حبيتها هالصفحه حسيت انها متربيه وبنت ناس :ma:


عاد قمت اتذكر شكتب قلت ايه ورى مااكتب لهم مواقفنا ايام العيد:ma:

اول يوم الله يسلمكم رحنا لعمي التسبير الله يطول عمره clap:وتعرفون الصباح معايد وسلام وكيذا ورسميات الساعه 9 شغلنا الاستريو وهات يارقص:fire: وسعه صدر وتصفيق كلنا الكبار والصغار والبنات وكل فئه رتبناهم:big: العجز حطيت لهم يادار وهات يامناقز ودي اقول اقعدوا الله يفشلكم <<يسمعون بالرقص وحده فاتحه يدها وخشتها وتطامر تسنها وحدتن منصك الباب على يدها :fire:والثانيه تهز رقبه وبطنها يهز معها ياحياة الشقى يالحمل والولاده عامله عمايلها فيها:ma: والثالثه ماسكه عصاها بيدها وترفعها <<تسمع بالرقص:bi: الاماراتي شجعناهم وراقصناهم وصفقنا لهم :زغرط:
جاء دور البزارين وحطينا لهم فتاحي ياورده وبصراحه هم كانوا اروع من رقص الوان فساتينهم ورقصهم ودلعهم ونظرات كل وحده للثانيه ولسان حالها يقول فارقي فستاني ازين من فستانتس :ao:
وبعدها دور البنات عاد انا وعذوبه فديتها مسوين فيها السنعات وهات ياترقيص بخلق الله اللي تعرف واللي ماتعرف الكل خليناه يرقص ويعبر عن فرحته وبجد كان هذا احلى شي صار بيوم العيد:yaaaahooo
بعدها تذكرت هاللي في المطبخ يكرفون ويغسلون:s15: قلت ورى ماارقصهم معنا ليش مانحسسهم انهم بين اهلهم ونذوقهم فرحه العيد معنا واطمر المطبخ واناديهم كانوا تقريبا 5 شغالات chef:
ايس فيه مي ايس فيه قلت تعالوا فيه هديه العيد<<<تسمع بالاغراء
قالت كيداب انتي انا ماابقى روه <<ماتبغى تروح:ma:
قلت تعالي والله فيه هديه واسحبهن انا وعذوبه قسم اوجعني بطني من ثقلهن حشى عظم الوحده تقل 4كيلو ذهب:bi: من الثقل مير ويصفطن خششهن من الحياء ووحده تقول ياربي ليس كيدا انا مااعرف قلت اها بس ونشغل لهم خليلوه خليلوه عاد هذي ترقص اللي مايعرف يرقص 2منهن اندنوسيات 2سيرلانكيات 1فلبينيه :cool:بالبدايه مسكت يديهن وارقصهم وهن مستحيات 5ثواني والله الا يوم ماعاد اشوف الا تفحيط ومطامر :yaaaahoooياحليلهن خشوا جو تمنيت اني مصورتهم تشوفونهم:ma: قسم اني اصفق مع الناس وميته ضحك ياعمري طلعن المواهب المكبوته داخلهن :bi:
مااقول الا الله يديم علينا نعمه الامن والامان والعز والراحه الحمدالله وجعل اللي حدهم على هالعيشه والغربه مايحدنا عليها (تحيه لكل الشغالات :باي:)


وهذي صوره الجريش اللي صلحته امي واخذناه معنا تفضلوا حياكم الله :ma:





ثاني يوم طلعنا للثمامه انا واهليclap:
هذا الله يسلمكم يوم جاء ثاني يوم اجتمعنا حنا وحريم العيال واخواتي ونطلع 7 سيارات للثمامه :fire:
وقال اخوي التسبير والله ماتلمسين الشوي ياميوشه انا اللي بشوي هالمره انتي سولفي واستانسي :inlove:
مير واطمر واحب راسه واقول يخي حبيتك احس انك بطران ولك عضلات<<<وش دخل العضلات الحين
عاد سوالف وضحك واميمتي لبى عيونها ضرس العقل طالع من الفرحه:ma: عشاننا من زمان مااجتمعنا تسذا
واتذكر اني جايبه معي كتاب مسابقات واطمر اجيبه واجمعهم تعالوا بقولكم شي بسرعه شباب تعالوا بنات يالله اجتمعوا<<تسمع بالتشويق :bi:
واولهم تاج راسي سلطان عمدتنا ربي يخليه قلت بسوي لكم مسابقه قال:حلو وانا علي الجوائز :fire:وكانت الجوائز نقديه بديناها من 10 وانهيناها ب500:punch:
واجتمعنا الحريم مع الرجال وانقسمنا فريقين ترى كلنا محارم ونقرب لبعض الا اللهم عن التسذب مرت اخوي هي اللي من برى بس مشخصه معنا ومتغطيه :bi:وصرنا واجدين وصار اخيي يسئل وهات ياحماس وصراخ تعرفون عاد الشباب فيهم عرق نذاله مره يقولون غش ومره يقولون انتم اكثر ومن هالاعذار
وصلنا للمسابقات الحركيه وهنا الضحك مضبوط طلب من كل فريق يطلعون 2 من اسرع فريقهم ويطلع من الشباب اخواني واحد اكبر مني والثاني اصغر ومن البنات انا واختي اللي اصغر مني لبى قلوبهم:خجلان:
قام ووقف وحده من السيارات بعيد وقال يالله اسرع واحد اللي بيوصل السياره جائزته 500 ريال
هو قال 500 كل واحد بلع ريقه ويطالع في الثاني وقال بتحتسب الجائزه فرديه للشخص موب للفريق
قلت هلا هلا كملت عز الله :زغرط:
والمشكله علي تنوره يابنت شلون بتركضين والله لو تحبين السماء ماقدرتي مير ويقوم ويركب في السياره اللي حدد المسافه عندها وال 500 بيده وقال اذا كبست فليشر ابدو:big:
هو كبس الفليشر وهات ياصراخ انا قمت اصارخ ومابعد ركضت واخواني داقين اللطمه ومربطين ثيابهم وهات ياركض
اختي بربع الطريق وقفت وقالت بطلت <<<اي بطلت 500 يالخبلا:fire:
وركض الا والله يوم تكرفع بندر قدامي وطاح وبدل مااسمي عليه ضحكت وركض وصار قدامي واحد بس واحط رجلي واسمع امي تصارخ كسار يكسر كرعانتس وجع تستري
قلت مايمديني خليني اوصل الفليشر وفيها حلال :bi:وركض والمسافه طويله شوي والله وتعبت ريقي نشف والهواء شقق خشتي قربت لااخوي وهو حاط رجله ومن الحماس قال ارجعي يالتسلبه:j:
حقير يسمع بالقهر والحماس ويوم قربنا للسياره حسيت جنوبي بتفجر خلاص وبغيت استسلم بس قلت يهبى ياخذها:bi: ويوم تقدمت عليه شوي ومابيني وبين السياره الا شوي دزني بيده وانا سافطه الطبلون ع الاخر الا والله يوم دبجت على كوعي وتمخشت:doh: وعاقبه ربي وطاح على ركبته وانشق سرواله اللي من جهه ركبته :bi:
قال اخوي وصلتوا بوقت واحد لك 250وهي مثلك غبرتوا علينا مالت عليكم ويمشي بالسياره بيرجع مكاننا قلت اصبر رجعنا معك :yawn:قال معصي ارجعي كعابي انتي واياه<<<<<نظرت اليه نظرات كلها حقد ولسان حالي يقول لقطي وجهتس وارجعي بكرامتس:ma:
والحمدالله غبرت وتمخشت يدي بس طلعت ب250 >>>>من جد وجد



وهذي صوره لوحده من الالعاب الناريه اللي صورتها هناك






ايه نسيت اقول لكم طبعا العيد فرصه للتواصل وصله الرحم وليله العيد طلعت واخذت هالهديه البسيطه للوالده الله يطول في عمرها :36_3_15:






وهذي للغالي سلطان اللي شوى عني وخلاني ارتاح لاني بالعاده انا اللي اتدبس في الشوي بس هالمره ماقصر ربي يخليه وهذي هديته واتمنى تكون اعجبته:inlove:





وثالث ورابع يوم كلها مايفضى بيتنا من الضيوف ماقدرنا نطلع بس يالله اهم شي انبسطنا هاليومين:big:
والحين الله يعيننا شايله هم المطرسه والله واليوم جايني مسج من المديره تقول فيه لااوصيكم بالاستعداد للعام الدراس وتحضير الوسائل <<<بغيت ارد عليها اقول فارقي بس :ma:


وبس هذا اللي صار معي
فيه اشياء كثير صورتها بس مااقدر انزلها لكم لاتسألون ليش لانه سر :36_6_5:

ادري ماعندي سالفه بس ذبحني الشوق لكم وقلت خل اسولف واخربط الين يجون احباب قلبي


في نهايه موضوعي بوريكم كم صورتن عندي:blu:





ياحياة الشقى ياناس وش حادهم والله لو انه ببلاش ماتراصوا تسذا

عاد لايفوتكم اللي عند الباب هو خشته :fire:







عيوونه

عيووووونه كل البلا من عيووووونه

لاوبدون رموش استغفر الله:bi:

يحلفون لو صمخ بجدار مادرى
الايرباق اللي في خشته بيقوم باللازم:big:







يابعد عيني صافطه الطبلون كللللللله
اعنبوا بليس هالمصور وش يبي يلاحقها مايسوى عليها الروعه والله



وبس
ابشركم خلصت
لاتحرموني فرحه ردودكم يابعد هالدنيا

ارق واعذب تحيه
بنـت الــشـــيوخ:36_3_16: