غالباً اللي يتصل على الجوال وما أرد عليه يرسل رسالة صح؟

بعضهم عنده سالفة ويرسل رسالة ويقول الموضوع اللي متصل عشانه :big:

وبعضهم جنط ومسوّي نفسه كافشهم ويقوم يرسل "أبيك ضروري" "أبيك بموضوع" "كلمني ضروري" والحين جابوا وحدة أقوى شوي وتلخم: "الرجاء الاتصال للأهمية القصوى" :mad:

الشاهد إن أي أحد يرسل رسالة من النوع هذا صرت أسفه تاريخه ولا أرد عليه لين يبيض

لأننا إذا اتصلنا عليهم بيطلع ماعندهم سالفة :lac:

أهلييييين شنتور شلونك ياخي؟ والله اشتقنا لك بس حبينا نسلم عليك

زين وين الضروري والأهمية القصوى والولادة القيصرية نعنبو حيّك؟

عشان كذا اللي مايقول وش يبي اسفهوه أزين

مهيب هذي السالفة هذا كان مدخل للموضوع الضروري

هذا واحدن من الجنوط زاه الله خير عقب سنوات طويلة من الصياعة والإنزلاق خلف الرغبات والانغماس في كيلو الطماط قرقر إنه يعرس

الجنط هذا كان عنده علاقات كثر شعر كوعه وعنده هدايا كثير جايته من الجنطات اللي كان يعرفهم زاهم الله خير

ويوم جا يعرس احتاس وماعرف وين يوزّي الهدايا خصوصن إنها واضح بنْحيل إنها جاية من بنت

صور ودفاتر وكتب و لانجري

يقطع أبو الذكريات اللي يعرفها

راح الجنط وقال لأخوه: يا لوح راح أحط الهدايا ذي عندك بصندوق مقفل لأني ما أقدر آخذها البيت وتشوفها المدام ولا أقدر أرميها لأنها فتحية على قلبي

قال له أخوه اللوح ابشر غالي والطريق خريص

وتزوّج الجنط ونسى موضوع الصندوق اللي عند أخوه اللوح

عقب سنتين قرقر اللوح إنه يعرس زاه الله خير

ولأن اللوح كان مؤدب وماله بالعلاقات والخرابيط كان بريء زاه الله خير سعبولته اللي تقوطر من براطمه ماتنشف من البراءة

أول وحدة راح شافها خق عندها وقال يمّه يمّه يمّه هذي هي هذي هي أبيها أبيها أبيها

وتزوّج اللوح ونقل بعض مقتنياته العفشيّة من بيت أهله وأخذها لعش الزوجية ومن ضمنها صندوق أخوه

الله يقطع أبو الأمانة اللي يعرفها

سافر اللوح شهر العسل وراح عستراليا ونيوزيلندن

وعقب مارجعوا بيومين بدت لقافة البنات وقامت المدام تفتّح الدروج وتفتّش البوك والأرقام اللي بالجوّال والدفاتر والكتب

وطاحت عينها على صندوق الكنز المفقود المنطول بزاوية غرفة النوم ومقفل بقفل بقّالة وملفوف بقفل سيكل

يوم طلع اللوح من البيت جابت عدّة السباكة والسواطير والمساويك وقامت تطقطق بذا الصندوق تبي تفتحه وتشوف وش فيه

لكن ماااش ماقدرت تفتحه

يوم رجع اللوح للبيت وجايب لها شمع أحمر عشان ياكلونه << فاهم الرومنسية غلط

إلا ولقاها بوجهه تقل ماوكلي شعرها منتفش وركبها مسودة وعيونها مبققة

قال لها: عشى ماسر؟ وش السالفة؟

قالت له: وش ذا الصندوق ووش فيه؟؟؟؟؟؟؟

قال هذا صندوق فيه أغراض حقت أخوي الجنط قسم بالله

قالت افتحه الحين أبي أشووووف وش فييييه

قال والله مهوب عندي المفتاح! عنده

قالت مالي شغل اكسره ولا شف لك دبرة

قاموا تهاوشوا على هالسالفة وطلع للصالة وقفلت على نفسها باب الغرفة وقعدت تصقع بهالصندوق بالسواطير وآباء وأمّهات جلمبو المحترمين ليييين فتحته

ويوم شافت اللي بداخله جاها شلل في الطحال

لبست عباتها وطلعت للشارع تبي تروح بيت أهلها

لحقها وقعد يحلف لها أيمان معظمة بكل الكتب السماوية والصحف اليومية إن هالأغراض مهيب له لكن مهيب مصدقة

قام وداها بيت أهلها عشان تريّح أعصابها كم يوم وبعدين يتفاهمون

اتصل بأخوه الجنط وحكى له وش صار قام انهبل

قال الجنط للّوح: لا يكون قلت لها إن الصندوق لي؟؟؟؟؟؟؟؟

قال له: لا إيه لا إيه مدري

المشكلة وينها فيه زاكم الله خير؟ المصيبة إن زوجة اللوح تصير بنت خالة زوجة الجنط

يعني الفاس كان يترنّح مايدري بيطيح على راس مين

عرف الجنط إن أخوه اللوح كب العشا وقعد يفكر بطريقة يطلع منها من هالمصيبة

قفل من أخوه اللوح وراح لزوجته وهي بالصالة وهو مييييت من الضحك

قالت له زوجته: عسى دوم هالضحكة ياروحي فرحني معك وش صاير؟

قال لها أخوي اللوح مسيكين توهّق مع زوجته وهقة ههههههههههههههه ورجع يضحك مهوب قادر يكمّل السالفة

قامت تحمّست زوجته تبي تعرف وش صاير مع بنت خالتها وزوجها

قالت تكفى تكفى تكفى علمني حبيبي وش صاير؟

قال لحظة لحظة هههههههههههههههههه مانيب قادر بطني بطني هههههههههههه

قامت صارت تضحك أكثر منه ههههههههههههه وماتوا ضحك قبل لا يقول لها السالفة

طبعاً هو للحين مايدري وش يقول لها ههههههههه

المهم وهي ميتة ضحك بدأ يألّف لها سالفة

قال لها: فيه واحد من الشباب كان تارك عندي صندوق فيه أغراض له وسافر كندا يكمّل دراسته

قمت تركت الصندوق عند أخوي اللوح لأني وقتها كنت مشغول بتأثيث الشقة حقتنا ياروحي

الغبي أخذ الصندوق معه للشقة حقته وزوجته فتحت الصندوق ولقت صور وهدايا حقت خوينا المسافر وماصدقت إنها ماهيب لزوجها

ومشت السالفة واستمروا يضحكون

اتصلت زوجة الجنط على بنت خالتها وهي ميتة ضحك وقالت لها عن السالفة وانحلت البشكلة

الشاهد

الواحد لاجا يعرس أزين له يحرق بيتهم ويحرق كل شي خاص فيه

حتى الشغالات وأخوانه يحرقهم

حتى الإيميل واليوزر حقه بمحشش يحرقهم

وأهم شي أصدقاه الفضايح يحرقهم ويدفنهم بالهند

مالها داعي يصير فينا مثل أبو سعبولة

خاصتن إني بريء أكثر شي

انتبهوا ها؟

سامحوني على الاختصار بس مستعجل عندي شغل باي شوي