(( ياليت من يجيب امي حسونه تطربكم بها ))




النص:

اليوم اتصلت علي وحده من الربع <<== حسني الفاطتس
قصدي اتصلت علي صاحبتي

اليكم نص المكالمه:

المذكوره:الو اهلين طخمة كيفك؟

انا: هلا والله تمام الحمد الله وش اخبارتس انتي وش مسويه وش العلوم <<== راعية طويله

المذكوره:الحمدالله <<==تقولها وكن احد يلحقها، اسمعي ملفوعه ترى الربع بيجون الاسبوع الجاي تعالي

انا: ايه طيب <<طيب وحده ناويه السحبه

المذكوره: طيب مع السلامه

انا :مع السلامه


بصراحه هالبنت فله منيب مصادقه ناس الا زيها ماتدوشتس بكثر الحكي والمكالمات هذي لو احد

يتسمع على مكالماتها بيشك انه داخل على سباق هجن مهوب مكالمه مع العلم ان لي شهرين

ماكلمتها !

<<<== الاخت متعوده على صديقتها اللي تهذر على راسها ساعتين واذا قال احد ابي التلفون
تقول توني مكلمه


الشاهد في الموضوع ان هالشله صراحه مالي خلق اروح لهم هذولي بصراحه صوره جليه لبنات

السويدي لا بغوا فجأه ميرندا يصيرون متمدنين
وانا منيب فاضيه اتمدن معهم ابي اقعد على قرونجتي تمدن من بنات ورا السويدي مانبيه <<== كنهم ذابحين لها احد

يقعدون لك كل وحده تطق الزين ومكياج بيتهم كله تلطخه في خشتها يعني زي العبده
وتنفش الشوشه ولا وبعد مايجون الا الساعه حدعش انا وحده انوم حدعش ونص ويبوني اجيهم

حدعش رح بس ياشيخ

والمشكله اذا رحت لهم اموت جوع ماعمري لحقت على عشاهم ماتجي الساعه عشر الا وابوي
يرنرن بواري لا وبعد هذا عقب المكاسر والترجي والا كان من ثمان وانا طالعه
<<==تطلع قبل لا يجي احد


لا وتراهم يحطون مع الشاهي بسكوت دايت <<== قولي من الاول ان السالفه فيها بطن

انا هالموضوع باطن تسبدي و ما ادري هالحرما اللي يلبسون شين اذا دخل معد طلع اصلاً مدري وشلون يدخلونه
مدري وشلون يستانسون ويعرفون يحكون وهم لابسين هاللي تاكـ(ن) نفسهم !
انا مدري اصلا وش معتقداتهم !
ولا ويبوني اصير مثلهم <<== لا بسم الله عليتس كلش الا انتي


الظاهر ان الوحده تحسب انها لو انها عرض الباب ولبست اكس سمول ودخل فيها بعد الفزعات صارت رشيقه
تراه هذا كله عشان لا سألوا وش تلبسين قالت سمول

لا واللبس صاكها مسيكينه وتحط رجل على رجل كنها ناقصه صكه !

عالعموم ترا هالاشكال دايم لا دقوا في العشاء وكلوا المقالي والمشاوي مايشربون الشاهي الا مع بسكوت دايت
عشان يحافظون على الرشاقه !


هو صراحه احنا يا اهل الرياض نحب نهايط ونسوي فيها حبة ونص

تلقاهم لا تجمعوا قلب حتسيهم انا يوم رحت باريس شفت ربرتوا كفالي تصدقون !
حتى هذا الفستان اللي انا لابسته تصميمه شريته بذاك الشي <<== وهي تبقونها شاريته من البطحا


يازين اهل القرى بس
الجمعه لا ماصارت في ضحويه وكل وحده جايتن بقميصها اللي خايستن فيه اسبوع <<== ماتبي الا الوصاخه

والفصفص والكراث ومزنه تشكى من ابو دحيم ماتصير جمعه

هذي هي الوناسه والفضفضه والبساطه مهوب ذوليك وتبوني اروح لهم بعد <<== من حارشتس !


/


على صعيد المطاعم انا صراحه غير الفول والتميس والعدس والفلافل مايمشي سوقه عندي

والا ذاك المندي اللي تاخذه من الهدوج وتدق فيها بالخمس في صالة بيتكم كذا الطعم الاصلي والشعور بالحياة

موب لا صفيت في مطعم وراز لك شوكه وسكينه وقطيعة لحمة ماتشبع دحيم !
يقالهم ستيك الله لا يخزينا

البساطه البساطه ياناس واياكم والتمدن تراه يفقدك احساسك بطعم الحياه

على فكره ترانا فاتحين مطعم يتميز بالبساطه في الربوه مايبيع الا فول وتميس ومعصوب حياكم الله

اللي يبي الكروكي يعلمني <<== الزيود لابغوا يسوون دعاية دخلوك منا وطلعوك مناك

/



يلا فوتكوا بعافية