# حلى موس الشمواه + كيكة الشبكه # <<< بنت شيوخ تعالي

مساؤكم ورد وياسمين

أخباركم إن شاء الله تمام

بقولكم على سر

والا هو مو سر بس سر

انا في يوم من الايام وعدت بنت شيوخ اني انزل طبخه

وقلت لها لما يجيني جهاز جديد تبشرين

<< بتعلمكم ان جهازها جديد خخخخ

المهم

الحين انا جيت اوفي بوعدي لك بنوته


وجايبه لكم طريقه حلى وكيكه

نبدأ بالحلى

بنات لا تقولون صعبه تراها حلوه مره وانا راح اسهلها لكم ان شاء الله


نقسم المقادير لمجموعات ،،

( أ ) :

كاسه ونص مويه

اربعة ملاعق حليب بودره

بكتين كريمة كارامل

( ب ) :

بالعدد ( 17 ) حبة بسكويت شاي

علبة قشطة

ملعقة نسكافه


( ج ) ( 10 ) مغلفات كيك اليمامه ( وممكن تزيد وممكن تنقص بحسب الصينيه اللي بتحضرين فيها )

( د ) ثلاثة ملاعق شوكولاته بودره

وهذي المقادير



نجي للطريقه :

1* يفك كيك اليمامه بحيث تكون كل طبقه لوحدها ونرصه في الصينيه بشرط يكون الجزء الخارجي من الكيك أسفل الصينيه

زي كذا


2* الخطوه الثانيه

نجمع مقادير ( أ ) ونحطها على النار ونحركها إلى أن تغلي ( شرط انها تغلي )

3 * الخطوه الثالثه :

ناخذ مقادير ( ب ) ونحطها في الخلاط ونصب عليها مقادير ( أ ) بعد غليها .



4 * نجي للخطوه الرابعه :

بعد ما نخلط مقادير ( أ ) مع مقادير ( ب ) نصب الخلطه على الكيك وبسرعه وهو حار نقوم بنخل الشوكولاته البودره عليها بواسطة منخل ناعم عشان يصير شكله مثل الشمواه


هنا قبل ما نحط الشوكولاته




وهنا بعد ما نحط الشوكلاته



نخليها برا مدة عشر دقايق بعدين نحطها بالثلاجه


الحين نجي للكيكه



( أ ) واحد ونص كاس دقيق // ملعقتين صغيره بيكنج بودر

( ب ) ثلاثه بيضات

نص كاسه زيت

كاسة سكر

ملعقتين حليب

ثلاث أرباع الكاسه مويه


( ج ) جبنه شرايح

( د ) مقادير السقوه :

نص كاسة مويه

بكت واحد كريمة كارامل

ملعقه نسكافه

فنجال سكر









الطريقه :

1* نخلط مقادير ( ب ) في الخلاط ونصبها على مقادير ( أ ) بعد ما ننخل الدقيق

بعدين نحطها في صينيه متحركة القاعده بعد تبطين قاعدتها بالقصدير

وندخلها الفرن




2 * بعد ما تستوي نخرجها من الفرن وناخذ الجبنه الشرايح ونصفها على وجه الكيكه على شكل شبكة

يعني كذا



3 * نجي للسقوه

نخلط مقاديرها مع بعض ونحطها على النار الين ما تغلي وبعدين نخليها تفتر شوي مع التحريك باستمرار عشان ما تجمد الكريمه

بعدين نصبها بالملعقه على وجه الكريمه ونخليها برى شوي وبعدين ندخلها الثلاجه

نفك جوانب الصينيه ونقدمها


هذا شكلها بعد ما صبينا عليها السقوه





وهذا شكلها وهي جاهزه للأكل



وبالعافيه عليكم

وسلامتكم

انتهت الحكايه خخخخخ <<< لا تشرهون

إن شاء الله تكون عجبتكم


سلام