خزعبلات وشطحات وخربطات مراهقة (لايطوفكم الموضوع)

المشاركة الأصلية كتبت بواسطة حلآ الـدوونـيـآ

( مـــقـــدمــــهـ )

هلووو شباب ..وتز اب مان؟
هلو فهمناها بس الثانيه وش معناها ؟ثقافتي برازيليه

هذا الموضوع اعتبروه مقتطفات من حياتنا .. أو مشاهد تمر علينا .. أو كلام بالقلب أبى الا أن يخرج <<ركزوا لي على "أبى" عشان تعرفون الكم الهائل من اللغه اللي عندي ..
وما فيه مانع اذا زدتوا من عندكم .. وهذا يعطي الموضوع حلاوه مثل حلاوة خشتي
ابشري بالزود


==





( إلــــى أمــــي )

لما ترجع من دوامك "مدرستك" تعبان ... زهقان .. طفشان ..
الدنيا كلها موب سايعه ضيقة خلقك ..
ودك بس لو أحد يحرك مشاعرك المكبوته عشان تنفجر في وجهه .. وتطلع كل غيضك وتعبك فيه !!
وتتفاجأ بأنه يقابلك بابتسامه تضيعك ! وتنسيك الدنيا ! وكلمه حلوه صغيره " يا جعل هالتعب فيني ولافيك"
تلقاك لحظتها ودك لو ترجع للدوام مره ثانيه وتتعب عشان ترجع وتسمع هالكلمه ..!
كلمه بسيطه غيرت يومك .. خلتك متفاااائل .. حيوي .. نشيط .. ومشاعرك إيجابيه طول اليوم
ايه بس خلاص الحين دور العيال حاتم وليان يبتسمون وانسى الدنيا وماعليها

( همسه .. كلنا نحتاج لمثل هالكلام .. فلا تبخلون على بعض برفع المعنويات )


==



( إلـــى أبــــي )

يقال " البنت بنت أبوها .. والولد ولد أمه ! "
لاوالله عندنا المثل يقول
البنت بنت امها والنخله نعنمها
على اني كنت أكثر وحده أرفض هالعباره !!
بس اكتشفت اني أكثر وحده أعمل بها !!
أبوي .. يا حلاة هالاسم والله ..
لما يقال اسمي في أي مكان عام وبصوت مرتفع أحس بشموخ وزهو .. موب عشان قيل اسمي!! لا !! عشان أبوي انذكر معي في نفس اللحظه..
يكفيني فخر انه يلازمني حتى بشهادة وفاتي !!
وقد قيل " كل فتاة بأبيها معجبه "
الله لا يخلينا منك يا أروع رجل في الدنيا " أحبك يبه
"
الله يخليه لك ان شاء الله ويخلي ابائنا بعد
بس حنا يالشباب نعاني من تصرفات الاب معنا بس يااحنا اغبياء بشكل مافهمنا انهم يعلمونا عشان مصلحتنا



==





( إلـى مــن كــنـت أحــب ! )
لما تحب انسان .. وتخلص له .. وتوفي له .. وتقطع قلبك له .. وتعطيه اللي غيرك ما عطوه .. وتعطيه بعد أكبر من حجمه.. بس لأنك تحبه ! وتقدم له كل شي يتمناه .. وفجأه لأقل سبب - أو بدون سبب - تلقاه يجرحك بكلمه تجي في الصميم !! ويوصل لك كلام مفاده – اني بغنى عنك الدنيا موب واقفه عليك - !!
هنا .. يكون الصمت أبلغ ..!
والدمعه أألم !!
والفراق أكيد .. بس أصعب !!
الحمد لله ماجربت هذا الشي
ولو يصير لي بذبحه وربي

أمانه قبل أروح وينتهي كل شي طالعني ..
عشان تعرف وش معنى العطا قبل الانانيه ..
أبرحل والطريق اللي يودي ما يرجعني ..
أبي يغنيني الله عن هوا حبك وطاريـّه ..
خذ الباب بطريقك والعذر ما عاد ينفعني ..
ترى ما عاد لك قيمه ولا للحب أهمية ..
صح لسانك ولسان قايلها



==



( إلــى صــديــقــتــي )

في زحمة الدنيا .. ومشاغلها .. ومتاعبها .. وأحزانها ..
هناك شخص ! ما يسكن معك ..
ولا يربط بينك وبينه لا دم ولا نسب !
بس تحبه كثر الدم اللي يجري بعروقك..
ولو تقدر عطيته عيونك ..!
لأنه من كل هالعالم .. هو الوحيد اللي يفهمك ..
و يسمعك .. و يتعبك ويريحك !!
الوحيد اللي تقدر تشكيله كل اللي بقلبك ..
ويشكيلك ..
ما يبخل عليك بنصيحه .. ولا فائده ..
الصديق وقت الضيق ولا ماصار صديق


لو عيوني تنطق حروف وكلام .. كان قالت انك أغلى من سكنها ..




==



( إلـــى عـــــدوي )

تدري أحبك !!
لأنك أكثر واحد تقول لي أخطائي وزلاتي "علناً " .. وأنا بدوري أصلحها .. وأصححها ..

على فكرهـ ..!
استفدت من وجودك في حياتي كثير ..
وببقى منك حذره ..
وهذا اكثر شي عاجني للحين
صحيح من علمني عيبي صار صديقي



==



( الى أبلة الفيزياء )

أبلا ليه تحــوبيني ؟
حتى أنا أحبك .. بس لو تفكينا من ريحة البصل اللي تعطرينا بها كل صبحيه .. كان زاد حووووووبي لك الأضعاف ..
الله لا يحرمنا من هالوجه
اللهم زد ريحه بصلها << متعلم النذاله من الساحره




==



( شــــطـــحه )

ليه اذا شرينا فلافل لازم نشتري معها مطبق وفول وتميس !!
من جد ليــــه ؟؟
والله انا اشتري الفول والتميس
والفلافل والمطبق يعني صارو فريقين



==






( خـــتــمة الــمـوضــــوع ) *م

صدّق أو لا تصدّق
القناعة كنز يفنى !!
ولو كل من ياخذ قنع .. وكل من ياكل شبع
كان الفرح غطى شوارعنا..
لو اعطى الشابع للجايع لما استوجع بطن الشابع من كثر الاكل ولما اسوتجع بطن الجايع من قله الاكل
...

صدّق أو لا تصدّق
كل النهايات البداية .. وأحلى البدايات النهاية
وكلنا رغم القساوة الظاهرة .. نبكي قدّام المراية
...
قاعد افكر في ذا الكلام << وش يقرب لك افلاطون
صدّق أو لا تصدّق
كل ما تباعدت المسافة بين الرغيف والجوع
تلقى الفرح أصدق..
...

صدّق أو لا تصدّق
إذا صارت كل المشاكل جوع الصغار وسقفٍ يداريهم
قبل يصحى النهار
تلقى الشعور أعمق..



==



تحياتي للشباب .. وقبلاتي للبنات

/
\
/
\
..][ ][ حــــــــــلا ][ ][..