بوقت من البطى وبليل تتراقص شياطينه
بعد شفت الضيا ينزع من ثياب المسا الثلثين

تحيالت المنام اللي مثل بيتك تمرينه
وانا اللي من تفارقنا وانا ماغمضت لي عين

غريبه كل حلم يمر في رقادي تزورينه
والاغرب كيف أحلم الحلم وارجع واحلمه بعدين !!

قبل يومين شفتك فالمنام وقمت من حينه
ونمت امس ورجع نفس المنام اللي قبل يومين

انا اللي قبل ما أسافر شلت قلبي من شرايينه
تركته في يدك مثل الامانه واحفظيها زين

ترى حفظ الامانه دين مجبوره تردينه
اجل مافي احد قط قالك حفظ الامانه دين ؟؟

مرد المقفي بيلفي ويستوفي وتوفينه
بعد ليله ثلاثه اربع عشره شهر شهرين

اذا انتي منتي بقد الكلام اللي تقولينه
حرام استأمنك حاجه واذا جيت اطلبك تنسين

تخونين وتبين ارضى واحد يرضى تخونينه !؟
انا لاجيت اخونك مع حبيبه ثانيه ترضين ؟؟

من اول مارجعت من السفر ماشفت لك بينه
وانا اللي كنت احسبك قبل ما أدوس ارض المطار تجين

تكونين انتي اول شخص عيني تحتضن عينه
وكنت اتخيلك من زود فرحة رجعتي تبكين

واشوف بدمعتك حكيك واعرفه قبل ما تحكينه
واجيب احلى من اللي بتحكينه واتركك تحكين

تقولين الوطن نور واقول بنور مضويه
تقوليلي غديت احلى واقول عيونك الحلوين

كلام نام بشفاهك وخفتي لاتصحينه
ذخرتيه الغرام اللي ينام ويتركك تصحين

تغانمتي غيابي لين رجحتي موازينه
تعلم من يدك لمس الكفوف وعلمك تجفين

وليتك لاقيتي به شيء فيني ماتلاقينه
مهو بغرور لكن خابرك مالج امل تلقين

تغافلك بغلا والا الحلا ماهو بمن زينه
تزينه الصور بس الصحيح ابن الحلال زوين

وانا ماني بناقص عنه يوم انك تبدينه
نصيبي هو نصيبي لو يسددها من الصوبين

قنوع بمظهري والسم مايذبح ثعابينه
على قول المثل ماني حلو لكن ماني شين

اذا اهداك الزهر مره فانا اهديتك بساتينه
واذا الهاك بفرح ليله فانا تهت لبكاك سنين

واذا استضعفتج املاكه وشتتج ملايينه
انا حتى فتات الخبزه اقسمها معج نصين

طموحي بس اجي واظفر بشيٍ تستحقينه
تدينته تسلفته سرقته مو مهم امنين

كاني من كثر مرضى بكل اللي تمنينه
لو انك تطلبين الله يعنيني بقول امين

انا ملعب على الحبلين وقت الطيش وسنينه
تبين الحين يوم اني كبرت العب على الحبلين ؟؟

ترى عند البدو بالذات عيب اللي تسوينه
حلاتك لاعشقتيني تعشقيني ليوم الدين

غرام نسكن ضلوعه حشيمه من مجانينه
جفى يجمع معزتنا ولا عشق يذل اثنين

اكثار اللي تحدوني وقالولي تحبينه
امانه لاتخليني صغير بعينهم تكفين

لاني كل ماقالو تخون اقول مسكينه
عليك الله وامانه علميهم منهو المسكين

انا خايف ليا طاح الجمل تكثر سكاكينه
وانا ماعادت ضلوعي تحمل طعنت السكين

مثل ماقالو المكتوب واضح من عناوينه
لو ارحل منك للغربه بسافر من ظلامك وين

كفاية كل حلم يمر في رقادي تزورينه
كفاية من تفارقنا وانا ماغمضت لي عين

قبل يومين شفتك فالمنام وقمت من حينه
ونمت امس ورجع نفس المنام اللي قبل يومين ..

اتمنى انه ينال اعجابكم

واكيد الشعر لحامد زيد

اختكم :: امووورهـ