للكبَاّر فقط

مدري متى باترك العادة الشينة ذي

لازم كل فترة أنزل موضوع أفضح فيه نفسي وربعي

لكن دام هالكلام مر عليه حوالي عشرين سنة مهيب مشكلة

طبعاً النفس البشريّة توّاقة لمدري وشو << وين صرقوع الجاهل يتعلّم

والوسائل الحياتيّة في الماضي السحيق مهيب مثل الوسائل الحياتيّة في الحاضر البقبقيق

يعني منوّل عشان الواحد يسمع صوت بنيّة كان يتعذّب ويطلع براسه كوع ولا سمع هالصوت

أما الحين حتى البزر اللي بالابتدائي صار عنده صديقة

أوّل ماوصلنا للمتوسّط وبدت أجسامنا تكبر والشنب صار أخضر وفيه شعرة وحدة بالدقن والصوت

كنّه صوت مكينة حلاقة وفي رواية كنّه صوت دبّاب توصيل المقاضي حق البقالات وبدت البنات

يتغطّن علين وحاصرتنا الهموم والأوهام وصراع فراق الطفولة والانغماس في المدري وشو

وبدت قواميس الكلام الوصخ في توسّع ولا تهون النكت الوصخة والصور الخليعة

كنا إذا شفنا صورة سميرة توفيق على غلاف شريط كاسيت سعبلنا

عاد تتداول في المدرسة سواليف النصب كل واحد يقول إنه يعرف وحدة ويكلمها تليفون
والنصّاب بعمره ماسمع غير صوت أمه واخته وخالته حصّة

والشباب الحليلين يصدقون يقومون يرجعون للبيت ويبدأ المشوار

كل واحد عقب ماينامون أهله يروح يسحب سلك التليفون وياخذه لغرفته ويبدا مشوار الاتصال على

الأرقام العشوائية عسى إنه ترد عليه بنوتة ترحمه من العذاب اللي هو فيه

ويسمع أنواع السب والتهزيء والدعوات المستجابة والغير مستجابة

كبرنا وكبرت أمانينا في البحث عن النصف الآخر دون جدوى

أول ما صرنا نسوق كان الترقيم على الرقم الثابت لأن الجوالات مابعد طلعت

ولأن الموتر ماهوب من زينه فما كان فيه أمل وحدة تدق

وإن دقّت فأم شنتور لها بالمرصاد بتلعن تاريخ أفكارها ومهيب مقفلة لين تقنعها إنهم يصلون الفجر جماعة وإلاّ تتوبين غصب عن اتصالات الليول

والله عانينا ياشباب قسم بالله وذقنا المر ولا أحد حس فينا للأفس الدشيش

أمس طبعاً كان أوّل أيام العيد البايخ رحنا كالعادة وتجمعنا نعايد على بعض ونتجاذب أطراف الزولية

ونشبت لعمّاني واحد واحد وماتركت أي واحد فيهم إلا وأخذت منهم عيديّة كان أكبرها 10 ريال

الله يذكر أيّام الخمسميّات بالخير طبعاً كنت أسرقها مهوب تجيني عيديّة

عاد تذكّرت أيّام العيد يوم كنا صغار كنا ماغير طراطيع وشروخة وصواريخ ومزح بايخ

نشب الشروخة ونحطها بجيوب بعض وتنفجر ونرجع بيوتنا نعرج لمدة سبع سنين

أما الحين الوضع شفته مختلف

شفت البزارين كل واحد فيهم ماسك جوال وقاعد مدري وش يسوي فيه وأنا اللي قاعد أطامر بين

عمّاني وهذا كبري أدوّر لي خمستريل عيديّة

عاد طقّتني اللقافة ورحت قعدت بجنب واحد فيهم قام حاول يحط الجوال بجيبه عشان لا أشوف

قلت له وش جهازك؟ قال N95 قلت هو زين؟ قال إيه رهيب

قعدت أسحّب فيه يمين ويسار وقلت له كم فاتورتك؟ قال 400

قلت أووف ليييه؟ تغازل؟؟ قام تلوّن الولد

توّه بثاني متوسّط قال لا لا وش اللي أغازل

قلت عادي يابن الحلال يوم كنت كبرك كنت أعرف 3 << إيه هيّن

قال والله ياشنتور كلنا نعرف بنات مهوب بس أنا

قلت منهو غيرك يعرف؟ قال فلان وفلان وفلان وفلان

كلهم أصغر منه

كنت بقول عرفوني على وحدة تكفون بس استحيت لأني توني كاذبن عليه وقايل له إني يوم كنت

بالمتوسط كنت أعرف 3 يعني بالنسبة والتناسب المفروض الحين أكون أعرف 300

قلت شلون تتعرفون عليهم؟

قال نروح الأسواق ونشغل البلوتوث ونرسل أرقامنا ونتعرف عليهم

قلت له البنات كبار ولا صغار؟ قال فيه بنات كبار وفيه بنات بعمرنا

ماقدرت أكمّل السالفة معه بصراحة.. وقفت بوسط المجلس وفجأة صارت فيه خلفية موسيقية

بصوت ربابة حزينة ودمعتي نزلت وقلت ليه يابابا استعجلت وجبتني ذاك الوقت ليه ليه ليه

يعني هذا بالنسبة والتناسب عقب 10 سنين بيصير يعرف 3 آلاف وألفين وخمسمية ألف بنت قسم بالله

وحنا اللي ضاع شبابنا وحنا نغازل أمهاتنا وخالاتنا بالأسواق ونتهزأ ونتصفّق

إيييه أيام كنا نسمع علي عبدالكريم مطرب الشباب ماكان فيه إلا محمد عبده وطلال الله يرحمه

وعلي عبدالكريم هم المتسيدين الموقف ومكتسحين الساحة

المشكلة كنا نسمع أغاني حب وحنا مب لاقين نملة تسولف معنا نعنبو القهر

مين رماااني رماااني فيييك يابحر الإثاااارة

ناعم الأوصاااف وررردي ناااعم الأوصاااف وررردي وررردي وررردي العبااارة

وذا المبزرة تاركيني أجمّع عيديّات وهم شغالين مسجات غزل ورسايل وسائط وأغاني

عاد تذكّرت واحدن من عيال عمّي كان عندهم بنت جيران اسمها منيرة

حاول ولد عمّي يغازل منيرة مليار ترليون مرة لكن ماتعطيه وجه

بعذرها لنعبو شكله عليه خشّة تقل خشّة قرد مضيّع بلنتي بكاس العالم

وآخر شي ملّت منه وراحت علمت أبوها قام أبوها علّم عمّي وعمّي تسبب في عاهة مستديمة لولد عمّي من كثر الطق باللّي البرتقالي

راح ولد عمّي جاب بخّاخ وكتب على جدار بيت جيرانهم "الله يلعن أمّك يامنيرة" << بدون الشدّات والهمزات طبعن

حب عنيف مهوب حب هالأيّام اللي الواحد يبيع حبيبته برخيص
يعني يا شباب الله يصلحكم لا تغازلون الا ان تعديتم السن
القانووني

ولو ما تغاازلوون بالمرة يكون احسن تفكون بنيات الناس من شركم
مع اني دارين انكم بريئين وش حليلكم

اصطخفر الله ونعم الوكيل باي