السلام عليكم ..
وش اخباركم معليش طولت الغيبه .. وها أنا ذا أعود وفي جعبتي الجزء الثاني من ((الزمن الكبريتي)) هاهاها ..
.
اللي ما قرا الجزء الأول وش يبي قاط وجهه روح اقرا الجزء الأول عشان تفهم الثاني ياروح أمك ..
.
شباب مشرفين لاتطولون السالفه ثبتوا الموضوع *وانا بشوته هاهاهاي* (مسوي خفيف دم أقول لايكثر وكمل بسرعه) ..

انشالله .. مثل ما قلت لكم في نهاية الجزء الأول اليوم نلقي الضوء على.. (مسوي تركي الدخيل :: مين تركي الدخيل) المهم نتكلم

على الشله اللي تسمى بـ شلة (المهابيل) وأفرادها هم .. (نيوتن _ افلاطون _ كولوم _ اديسون) طبعا حذفنا أرخميدس منهم لانه

مريض ومتنوم بمستشفى "كبريتون" شهر الله يشفيه طبعا انا قلت سابقا ان هذي الشله اغبياء مايعرفون يعبرون راسبين في التعبير مع

مرتبة الشرف خصوصا كولوم واديسون .. ألا نيوتن هو أذكى واحد فيهم وطبعا دايما يرفعون ظغطه المسكين ..


تنبيــه/ الكلمات التي بين الأقواس تعليق على مايحدث ..



ونبدأ القصه . . .


في يوم مشرق والقمر منير والسماء صافيه والجو ملبد بالأتربه والغيوم والأعاصير والأمطار الغزيره جعلها الله امطار خير وبركه وعم

بنفعها أرجاء البلاد ... درجات الحراره في معظم مناطق المملكه .. الرياض 27 _ 11 الدمام 30 _ 15 جده ...

اووووه نسيت دخلت جو مع الاحوال الجويه حقت القناة الأولى (الله يذكرك بالخير ياحسن كراني) المهم ..

كان نيوتن رئيس شلة المهابيل يغسل سيارته قدام باب بيتهم وينظفها ويلمعها ويعطرها ويزينها ووو.. لين قالت السياره بس ..

مر عليه افلاطون بالسيكل حقه وقال: الحين انت ووجهك يا نيوتن اللي تقول راديو خربان من اسبـوع (بدأت أخطاء التعبير) متى نروح

للإستراحه عشان نتابع مباريات كأس أوروبا ونكمل التحدي مع شلة المغرور المتنبي ..

قال نيوتن : ياغبي انت وحواجبك اللي تقول شنب صعيدي انا ماقلتلك امس بنروح الساعه 8 ..

بس اهم شي جاهزين اديسون وكولوم ولا زي كل مره يأخروننا ..

قال افلاطون: اكيد جاهزون انا بقول لهم وانت لاتنسى تمرهم وانا عشان نروح الاستراحه اللي بنتابع فيها كأس...

قاطعه نيوتن وقال: بس بس لا يكثر انت روح وانا بآخذكم الساعه 8 .. باااااااو

(ملاحظه باااو بلغة نواف اللي هو انا يعني باااي . الكلمه هذي خاصه فيني بس اضيفها لكلمات شلة نيوتن .. فهمتوا ) ..

وجات الساعه 8 وأخذهم نيوتن وراحوا الإستراحه .. وكان في انتظارهم شلة المتنبي ..

دخلوا الاستراحه بهدوء .. (وطبعا في الاستراحه تلفزيون بشاشه كبيره تقول سينما حماااس حق المباريات)

قالوا شلة نيوتن: السلام عليكم ..

ردوا شلة المتنبي: وعليكم السلام ..

قال عنتره بصوت خفيف: اف جو المهابيل ..

قال اديسون: سمعتك . أنتوا المهبول !

قال كولوم: اديسون حبيبتي انت غلطت في التعبير المفروض تقول انت المهابيل !

قال نيوتن: اسكتوا لا بارك الله فيكم فشلتونا يا أغبياء انتوا الأثنين بالذات لاتتكلمون ..

قال اديسون وكولوم بصوت واحد: طيب يانيوتنا العزيزه ..

وجلسوا .. . في هذي اللحظه قال الفرزدق لجرير: اتحداني اخليك تضحك .. قال جرير: وش بتسوي ؟

قال الفرزدق: مالك دخل انت بس اسمع واضحك ..

راح الفرزدق وبخبث شديد لكولوم وقاله: وش اخبارك يا كولوم ؟ (يدري ان كولوم مايعرف يعبر)

قال كولوم: هلا !!

قال الفرزدق: وشلونك؟

قال كولوم.. صحه وعافيه !!

قال الفرزدق: وشلون دراستك؟ قال كولوم: بخير وتسلم عليك !!

(عاد كان قبل يومين خال كولوم توفى) قال الفرزدق: عظم الله أجرك في خالك.. قال كولوم: غالي والطلب رخيص !!!

وعاد في هذي اللحظه الشله كلهم انسدحوا بالأرض وضحك على كولوم المسكين .. وقال نيوتن لكولوم: آخر مره تجي فشلتنا ..

المهم قعدوا الشباب يسولفون وتحولت السوالف عن الانديه ..

(طبعا الانديه في الزمن الكبريتي زي انديتنا بس الاختلاف في اللاعبين . يعني ممكن تشوف ماجد عبدالله وسعد الحارثي هجوم في نادي واحد او يوسف الثنيان والشلهوب في وسط نادي واحد .. او مارادونا وميسي مع بعض ) ..

عاد قال جرير: شوفوا ياشباب الأهلي قلعة الكؤوس احسن نادي ..

قال عنتره: بعينك الإتي العميييد ياكلك أكل البرشومي ياكلك حبه حبه ..

قال الفرزدق: النصر العااالمي يا بابا النصر بمن حضر ..

قال ابو نواس: هاهاي الهلااااال زعيم نصف الارض .. قاله عنتره: سلملي على ابو زنده بس !!

وقال المتنبي: بس لايكثر ! الشباب الليث شيخ الانديه ملوك الفن وبسسسس ..

قال الفرزدق: ياعمي رووووح انت وناديك اسود وابيض تقول تلفزيون قديم .. بعدين انتوا ماعندكم جماهير !!

قال المتنبي: يا اهبل كثر الجماهير لو ينفع كان نفع نصرك اللي على كثر جماهيره 9 سنوات بدون بطوله وينافس عالهبوط !!

ولو كثر الجماهير ينفع كان نفع منتخب الصين أكثر شعب بالعالم ومنتخبهم زي وجههم !!

قال ابو نواس: ياعمي الشباب قدام الهلال يصير زي الحمل الوديع يبتسم فقط ..

قال المتنبي: اسمع يا ابو ثلاثه .. الليث لايبتسم الليث إذا فتح فمه وبانت أنيابه يعني يقول لخصمه جهز نفسك بآكلك ..

وقـــــال المـتـنـبـي بـصـوت عــــاااااااااالـي :


:: إذا رأيت انياب الليـث بارزتا ..... فلا تظنن أن الليـث يبتسم ::


(وهنا صفق التاريخ للمتنبي وخلد هذا البيت الشهير في صفحاته ..)

وطبعا كل هذا كان في حضور شلة نيوتن اللي كانوا يتفرجون عليهم ..

وقال نيوتن: انديتكم هذي خلوها لكم .. اوروبا متعة الكره وبس احسن فريق أكيد البارسا برشلونه ..

قال افلاطون: الرياااااال الملكيوون سيدات ملوك كل الانديه البرازيليه والعالميه .. (خطأ تعبيري فادح)

قال أديسون: ياسلام على التانجو البرازيلي وهم يلعبون خصوصا إذا كان الحارس كاسياس والهجوم ايتو ..

وقال كولوم: احسن نـادي هولندا بس ليش مايشترون ياسر القحطاني و ميسي ؟؟

وبس قال كذا وماتشوف الا قوطي بيبسي طااااير من يد نيوتن على راس كولوم الغبي ..

وقال نيوتن: اقسم بالله انها آآآآخر مره اجيبكم في الاستراحه يا المجانين يا الهبلات ( مسكين نيوتن صار غبي) !!!

وراح نيوتن رجع بيتهم وترك شلته مع شلة المتنبي في الاستراحه ....
.
.
.
.
.
.
خلاص بعد وش تنتظرون خلصت القصه ..

القاكم في الجزء الثالث من ((الزمن الكبريتي)) ..
.
.
وفي الجزء الثالث بيكون الكلام عن شلة (الاشرار الزاحفون) وهم .. ( هتلر - تشرشل - موسوليني ) ..

وكيف خطفوا المسكين كولوم .. وكيف جننهم كولوم بغبائه .. وتحسفوا ورجعوه وفوقه خمسين ريال بعد !!!

اشكر كل من بقق عيونه على القصه كاملـه .. دم تم دم تم دمتم سالمين طوط طوط ,,

آسف على الإطاله والتأخير ...



((طبعا إذا مافي تفاعل راح اوقف القصه هنا واكملها في منتديات نادي الشباب)) طيب


وشـــــكـــــــــــرا ........