الأسواق الشعبية

1. كرداسة وتقع في منطقة قريبة من الهرم .... وكرداسة قرية ريفية فيها شارع واحد على يمين ويسار هذا الشارع محلات يبيعون الجلابيات والملابس والاكسسورات ... أسعارهم متفاوته من محل لي محل .. لا تنسى المكاسررررررررررررر ..... والافضل انك تتفق مع ساق التاكسي اللي بيوصلك انه ينتظر وتتفق معاه على السعر من البداية.

2. الغورية : وهو سوق شعبي تدخل في ممر ضيق وتوجد على يمينك ويسارك محلات متنوعة يبيعون الفوط والشراشف والمواعين وغيرها الكثير.....

3. خان خليلي يوجد في الجهة المقابلة للغورية ماعليك سوى عبور الشارع أو عبور جسر المشاه والانتقال الى خان الخليلي ويحتوي على التحف والنحاسيات والجلديات وغيرها الكثير.

4. الحسيـــــن : يوجد في منطقة الحسين العديد من المحلات يبيعون كل ما يخطر في بالك وما لا يخطر في بالك ... يكفي أن تجلس على أحد المقاهي وتحط رجل على رجل ويجونك البائعة المتجولين ( بمعدل بائع كل 3 دقائق )

5. وسط البلد : وهو أشهر الاسواق في مصر ويحتوي على عدة شوارع منها شارع فؤاد وشارع طلعت حرب وشارع عبدالخالق ثروت وشارع عدلي وشارع شريف وشارع قصر النيل.

6. روكسي وهو قريب من مصر الجديدة وتقريبا المحلات الموجوده فيه نفسها موجوده بوسط البلد وبعض المحلات موجوده في رمسيس هلتون... لاتنسى وانت تتمشى في الشارع تاكل شوارمة موتشرب عصير مانجو من مطعم أبو حيدر .... طعم الشوارمة لذيذة وايضا عصيرهم.

7. شارع جامعة الدول وأقصد المحلات اللي على سور نادي الزمالك: مثل محلات سمراء للأحذية والمحلات القريبة منه.

8. شارع عباس العقاد في مدينة نصر.



المجمعات التجارية:

1. المحلق التابع لفندق رمسيس هلتون ويعتبر أفضل المجمعات للتسوق .. أنا شخصيا معظم أغراضي شريتهم من هذا المجمع. فيه محلات القطنيات والشنط والاحذية والجزم والجلابيات وكل حاجة.

2. مجمع سيتي ستارز ويقع في مدينة نصر : مجمع فخم جدا ويحتوي على 4 أو 5 فنادق ملاصقة فيه فيه بعض الماركات العالمية وبعض المحلات الراقية كذلك فيه ملاهي للأطفال وسينمات ومطاعم مختلفة وكوفي شوب مثل ستار بكس وسينبون.واللي بيروح لمصر لازم يزور سيتي ستارز.

3. السراج مول : ايضا يقع في مدينة نصر في الطابق الارضي توجد صالة العاب للاطفال وبليارد والعاب الكترونية وكوفي شوب ...

4. فيرست مول : وهو ابيخ مجمع دخلته يوجد في الطابق الارضي كوفي شوف المينمم شارج حقة 55 جنية تقريبا وفوق فيه محلات معدودة على الاصابع والاسعار مبالغ فيهااااااااااااااااااااااااا وخيالية.... ما يسوى العنوه.

5. أركاديا مول ويقع على كورنيش النيل في منطقة اسمها روض الفرج وقريب من فندق الكونراد: انا شخصيا عجبني هذا المجمع فيه فيه كذلك ملاهي للأطفال ومطاعم ومقاهي ... أنصح بزيارته


6. جنينه مول


وهو مول موجود في مدينة نصر ..
يحتوي على الكثير من المطاعم والمقاهي وبالذات في الدور الثالث
كما يحتوي على محل حلويات جميل اسمه تسيباس .. وله عدة فروع أخرى غير الموجود في المول مثل المهندسين والعتبة ومصر الجديدة

بانوراما حرب اكتوبر

توجد في طريق صلاح سالم ..
وهي عبارة عن مبنى جميل .. أسطواني الشكل .. على الطراز الإسلامي
تم إنشاؤها بعد حرب أكتوبر مباشرة .. ويتم فيها عرض الحرب بطريقة شيقة ومبسطة



المطاعــــــــــــــــــــــــم :

1. مطعم قدورة ويقع في شارع جامعة الدول العربية والفرع الأصلي موجود في الاسكندرية ... أنا شخصيا عجبني هذا المطعم جدا جدا وأكله لذيذ .. نسيت أقول لكم ان هذا المطعم للأكلات البحرية .. أول ما تدخل المطعم بتلاقي على يسارك روفوف فيها انواع من الاسماك والجمبري والخثاق والاستكوزا وغيرها من الاسماك اللي ماعرف منها غير البلطي طبعا بتختار اللي تبية وتقول للعامل شنو تحب السمك مقلي والا مشوي... وتصعد فوق وتنتظر أكلك وبالهناء والعافية
نسيت اقول لكم لا تنسون تحلوووووووون بالبطيخ وتشربون شوربة السي فود
بخصوص السعر على ما اعتقد يعادل 50 جنية للفرد .


2. مطعم المنوفي ويقع في شارع فيصل بالهرم وهو مطعم متخصص بالكباب والكفتة والحمام المحشي ،،مع اني ماأحب الحمام المحشي.
3. مطعم حضرموت اللي في المهندسين وبإمكانك انك تتصل لهم بالتلفون ويجيبونه لك لشقتك والمندي حقهم لذيذ ابقول لكم شي عن مطعم حضرموت يقولون ان اللي في المهندسين هو الاصلي ولا تصدقون الاعلانات اللي يرمونها عليكم في التكاسي تراهم حرامية ونصابين .
واحذروا من الكروت اللي يرمونها عليكم في التاكسي ... ثاني يوم وصلت القاهرة صادني كرت لمطعم حضروموت في عيني والحمدلله جات سليمة. وتذكرت حزتها كلام بعض الاخوه اللي حذرونا في المنتدى والله معاهم حق.
تعرفوت شنو صرت اسوي !! صرت أغمض العين اللي ناحية النافذة مالت التاكسي لي حسيت بأحد يقترب من السيارة تعقدت


4. مطعم فلفلة : ويقع في وسط البلد اتوقع شارع فؤاد اذا ماخابني ظني وبعا هذا المطعم سياحي وتاريخي وأكله روعه ولا يعلى عليه ولازم تروحون له.

5 مطاعم الفاست فود
ويا كثرها منها بيتزا هت وماكدونلدز وبرجر كنغ ... ابتعدوا عن كنتاكي سبب لنا تسمم.

6 الدمياطي للفول والطعمية في المهندسين.

7 الجحش للفول والطعمية في السيدة زينب.

8 وللي يحب الفطير المشلتت عليكم بفطاطيري الحسين يسوي كل انواع الفطير المشتلت .... روووووعة ويقع في الحسين في المقاهي اللي في الجهه الخلفية .


9 مطعم هبي دولفين : وهو مطعم يقع على النيل مباشرة في المنيل شارع الملك عبدالعزيز قعداته نيلية حالمة وناسسسسسسسسسسه والله وعندهم بحيرة فيها بط وبجع وعندهم كذلك يخت يطلع كل ساعة ياخذك بجولة في النيل لمدة ساعة وسعر الفرد 5 جنية .
وعندهم مينمم شارج 32 جنية للفرد .
يفضل الحجز المسبق أو الذهاب مبكرا أي في تمام الساعة 11 ليلا حتى تحجز لك مكان.


10فرايديز وهو عبارة عن سفينة ثابتة على النيل ... فيه مجموعه من المطاعم منها فرايدز ومطعم للأطلات البحرية وسينبون ومقهى خارجي. أنا جربت فرايديز وهو مطعم متخصص في الاكلات الاميريكية . بس تبون الصراحة ما ارتحنا فيه تعرفون ليش !! لأنه ما يصلح للعوائل يصلح للشباب فقط ..



ملاهي دريم بارك


تقع ملاهي دريم بارك في مدينة 6 أكتوبر وتعتبر أكبر ملاهي في الشرق الوسط وتحتوي على أكثر من 32 لعبة ويوجد بها كثير من الالعاب غريبة وعجيبة ومثيرة .. وتصميم الملاهي رائع جدا ...

وأنصح بزيارتها وبقوووووووووووه

ونصيحه أذا بتروحون لها لازم تروحون من بعد صلاه العصر مباشره لأنها كبيره مره وتحتاج وقت عشان تستانسون فيها ،،

راح أقولكم كيفية الوصول الى الملاهي
إتفق مع اي سائق تاكسي تكون مرتاح معاه .. إن يمر عليك في اليوم اللي تحدده للذهاب الى دريم بارك وأتفق أيضا معاه إنه يرجعك مره أخرى .. بحيث يذهب ويأتي بالوقت اللي انت تحدده ويكون بينكم اتصال طبعا .. ولا تنسون تتفقون معاه على السعر وعموما الاسعار تتراوح بين 70 - 80 جنية ذهاب واياب هاذي الاسعار بالنسبة للصيف أما بعد الصيف ما عندي فكرة بس أتوقع يكون السعر أقل.

رسوم الدخول: 50 جنية شاملة جميع الالعاب عدا 3 العاب خطرة

اسمع الناس اللي واقفه في الطابور تتحنده على الاسعار يقولون انها كانت بـ 40 والحين ارفعوها 50 جنية.
ترى عندهم نوعين من التذاكر النوع الثاني بـ 70 جنية وهو vip ويستطيع الشخص أن يركب فيها ثلاثة العاب اضافية خطرة وهي الصاروخ وسباق السيارات و قطار الموت ...

فأنصحكم تقطعون اللي بخمسين جنية واذا فكرتوا تركبون الالعاب الخطرة تقدرون تحجزون من اللعبة مباشرة وسعر التذكرة 7 جنية

مواعيد العمل :
من السبت الى الخميس : من الساعة 4 عصرا الى منتصف الليل
يوم الجمعة : من الساعة 12 ظهرأ الى منتصف الليل

شوفوا على اليسار المكان اللي تقطعون منه التذاكر

وشوفوا عند البوابة اللي مسقف باللون الاخضر من فوق فيه قطار ياخذك لفه على الحديقة أنصحكم قبل ما تدخلون تركبون القطار عشان تشوفون الملاهي كلها .. مو تسوون نفسي ركبت القطار وآنا طالعة من الملاهي وماشفت الحدايق ولا المزارع لأنه صار ظلام........ مدة الجولة 20 دقيقة

حديقة الأزهر ( الأزهر بارك )


أحدث وأجمل حديقة في القاهرة .. مقامة على مساحة 30 فدان ، توجد بالقرب من قلعة صلاح الدين .. بحيث يمكنك رؤيتها وأنت في الحديقة
بها مطعمين .. الأول اسمه مطعم القلعة ، والثاني مطعم البحيرة
مطعم القلعة مبني على الطراز المملوكي .. وهو في الجهة اليمنى من الحديقة
أما المطعم الآخر فهو في الجهة اليسرى .. ومقام وسط بحيرة صناعية رائعة

يوجد كذلك في الحديقة مقهى اسمه تريانون .. وهو على هضبة مرتفعة .. تُعتبر أعلى نقطة فيها .. تتخللها نوافير في غاية الجمال


والحين راح آخذكم بجوله في

نهر النيل الخالد

أحلى متعة وأحلى جو وأحلى فسحة
واللي يروح القاهرة وما ياخذ جولة في النيل ما جنه راح القاهرة


بقولكم من وين ترحون للمراكب اللي بالنيل؟
أو بالاصح أفضل مكان وأنا طيحت عندهم
رحت لهم 5 مرات تقريبا

قولوا لسواق التاكسي ينزلكم عند كبري قصر النيل جهة المراكب اي في الجهة المقابلة لفندق النيل هلتون وهناك بتلاقون مراكب على أفا من يشيل وأسعارهم 40 جنية للساعة .. وأحلى وقت إنكم تروحون قبل المغرب بنص ساعة عشان تلحقون على النهار والغروب والليل ( ثلاثة في واحد) واذا ما شبعت وحبيت تزود المدة ما عليك الا تقول حق اللي يسوق المركب أبغى نصف ساعة زيادة أو ساعة على حسب وناستك

وعلى فكرة في ايضاً مراكب .... يدفعون على الشخص الواحد
والقيمة 2 جنية لكل فرد ومدة الرحلة 30 ساعة
وطبعا ما راح تكون بروحك راح يكون معاك مجموعة من الناس وهيصه
وعندهم عاده حلوه المصريين اللي يتزوج او يخطب لازم ياخذ عروسته بعد العرس بفستانها ويتمشون على النيل ويتصورون مع اصحابه،،حياتهم كلها وناسه


خلاص انا تعبت الحين اذا لقيت تفاعل من الاعضاء بكمل واحط لكم الصور،،،سي يو

مواضيع ممكن تعجبك :

السياحه في تركيا - السياحه في مصر - السياحه في ماليزيا - السياحه في لبنان

السياحه في المغرب - السياحه في اندونيسيا- السياحة في النمسا - السياحه في الامارات

فنادق ماليزيا