بعد ماقرقرنا أنا دحووومي جليل الحيا الانطلاق للكويت في رحلة مباغتة واستكشافية مرني قدّس الله سرّه على البيت علشان ياخذني بوقت صلاة الفجر.. يوم طلعت وحطيت العفش والدلال والفناجيل والخيام بسيارته قال يلله نصلي الفجر بمسجدكم وننطلق..

طبعاً ماقلت له إنّي قبل شوي صلّيت الفجر بالبيت وخلاني أصلي الفجر مرة ثانية

عاد عندنا إمام على كيف كيفكم يختم القرآن في كل ركعة الله يجزاه خير

عاد دحووومي تعب بوسط الركعة الأولى وتربّع << هذي قويّة

طلعت الشمس وارتفعت قيد رمح وحنّا مابعد سلّمنا

سلّم الإمام ومن زود الفرحة دحوومي قام يطق اصبع ويطلع من باب المسجد وهو يقول ورا ورا ورا ويطق اصبع مع كل وراياية

عاد وأنا أبي أطلع من المسجد فيه واحد جنبي من الجيران عقب ماسلّم قاعد يستغفر بسرعة كنت بقول له يابو علي قل وتيمك بنفس السرعة وشف وش يطلع معك

بس قلت مالها داعي تأخرنا على الإنطلاقة

مسكنا الخط وقلت دعاء السفر بدون مايسمعني دحوومي لأني دايم ألخبط بين دعاء السفر ودعاء ركوب الدابّة

مشينا ومسكنا الخط وحنّا نردد يامال يامال يامال ياماااال .. هييييه

وصبّوحة خطبها نصيب أوووه خطبها نصيب..

رحنا عن طريق رماح والجو كان خطير صراحة ،
عاد ما أمداني أقول الجو خطير إلا دحوومي طفى الكنديشن وفتح الدرايش وطلّعنا ايادينا من الدرايش وحنا مشمّرين وفاتحين أزرار الثياب ولافين الشمغ كنّنا راعين غنم

نمشي في هالصحاري ويقول لي شوف ذاك اللي قاعد مع الابل متكّي .. يازين هالقعدة

وأنا أقول له شف ذاك اللي معه الغنم.. بصراحة أفكّر أستقيل وأشتري لي غنم وأقعد أتمشى في هالبرّان..

قال لي انت بتاكلهم كلهم .. قلت له إيه وعقب ما أخلص منهم بجي أحوّل على الابل اللي عندك

مشكلة البدو لا تجمعوا

ويوم تعدينا الرفيعة وقربنا نوصل للخفجي فإذا بي ألقى الرجال انهبل ودخل الرمل وطلع من الطريق المسفلت
عاد أنا بغيت أسوي ذهين وعلى بالي بيخطفني فكنت باتلطم وافتح الباب وأتقلب على الرمل وأنحاش

بس قلت اهجد يابروس لي وخله يخطفك ولا تموت من العطش وآخرتك ياكلك النمل اللي كبر الفيل

قلت له .. وش نوحك انت ؟؟

قال أها بس .. خلنا نعرف نسوق..

قلت له أبك انت صاحي ولا مخذرف ؟؟ وش ذا الطريق ؟؟

قال طريق الحضر ذاك بيمغط بنا مية كيلو زيادة

عاد من كثر ماطامرنا داخل السيارة وراسي ماغير يصك بالسقف وبالأبواب جاني ارتجاج عكسي بالمخ تسبب في عودة المخ إلى مكانه الطبيعي بعد معاناة طويلة

وصلنا الخفجي وتعدينا الحدود ودخلنا الكويت بحمد الله تعالى..

ومسكنا طريق الملك فهد اللي بالكويت وندوّر على فندق المارينا اللي بنسكن فيه لكن قلنا قبلها نبي ندوّر على مكان نغسّل فيه السيّارة..

ويا إننا مشينا مشي مو طبيعي وضعنا وحسنا.. خمسين مليون دائري عندهم تروحون يمين تضيعون تروحون يسار تضيعون ماتروحون مكان انتم ضايعين ضايعين الله لايعوق بشر

سألنا واحد بمحطة بنزين الله يجزاه خير قلنا له وين نلقى مغسلة نغسّل فيها السيّارة ؟؟

قال (بيان) قلنا له يابن الحلال بيان إيه اللي انتا قاي تؤول عليه .. حنا من السعودية.. قال الله يحييكم..

زين يبه تروح سيدا من اهني وبعدين (فوق تحت) تلقى مدري شنو على ايدك اليمين تدش من عندها وتلاقي المغسلة.

فوق تحت ؟؟؟؟ إيه هوّا اللي فوق تحت دي ؟؟

بعدين اكتشفت إن فوق تحت يعني U Turn

بعد ضياع استمر قرابة الساعة وكمّيات كبيرة من الفوق تحت لقينا مغسلة غسلنا فيها السيارة وانطلقنا متجهين نحو الفندق

الفندق كان أزين شي في الرحلة كلها

وأنصح أي أحد بيروح الكويت يسكن فيه.. فيه باب من داخل الغرفة يطل على البحر مباشرة وكلها 50 متر وانتم واصلين للشاطئ الخاص ولو رحتوا فوق تحت بتلاقون المسبح الخاص آز يو لايك




عاد القهر إننا قاعدين ثلاث أيّام ولافكرنا نروح نشوف البحر هذا عبارة عن وشو بالضبط

وطول الطريق ماغير نقول يازين البر ويازين البعارين ويازين الحلال ويالله لك الحمد والشكر

بس عن قولة جلسة عند البحر استحينا وطلعنا الساعة 3 العصر والرمل يغلي ومشينا للبحر وحنّا نطامر من الحرارة كننا في دعاية ميرندا رحنا سلّمنا على البحر ورجعنا الغرفة وحنّا دايخين من الحرارة ونتخيّل البعارين والغنم يسبحون بالبحر ولابسين بكيني

قلنا خلنا ننام شوي قبل لانروح نتغدا لأننا كنا تعبانين من عقب الطربقة والتطعيس حسبي الله على اللي كان السبب

وقمنا تكشخنا بثيابنا السعوديّة الغرّاء وشمغنا الحمراء وتطيبنا وحطينا الميك أب

والله ياجماعة شفنا شباب حاطين ميك أب بأم وأخت وجدة أعيننا

المهم يوم رحنا نستكشف المارينا مول بحسب ما اشار علينا واحد جويتي

دخلنا المول يوم الأربعاء المسا وكان أنواع الإزعاج والزحمة.. رحنا اخترنا طاولة جدام واحد من الكافيهات مدري شسمه من الخبصة اللي صايرة هناك

يلسنا والأنظار تتجه صوبنا من كل مكان وحسّينا إن الوضع شائك..

نظرات البنات تتباين مابين متميلحة ومتغليّة ومستنكرة ..

ونظرات الشباب تتباين مابين حاقد ومستنكر ومنيب قايل وش بعد

نسبة الجمال منخفضة جداً ياحبي لبنات الرياض بس

ماشفنا شي يسر العين علشان جذي مارسنا التغلي بكل الطرق والوسائل

رحنا للكنيسة وشفنا بيت مؤذن الكنيسة كان عنده زحمة الظاهر يبيع ماي مقري عليه

شفنا ديوانية السنعوسي .. ومترنا شارع الخليج وياكثر مارحنا فيه فوق تحت فوق تحت فوق تحت

وبصراحة بنيد القار هو الأجودي الوحيد .. صحيح كان فيه سباقات وراليّات لكن كان ونيس هالشارع

رحنا تعشينا في ميس الغانم طيب الله ثراه مدري هو حي ولا ميت لكن شفنا واحد بالمطعم لابس دشداشة وقترة ورافع صوته يقول السعاودة السعاودة

فقلت الله يرجك يالمصرقع شلون عرفت إننا هنا

ووحدة جالسة بطاولة ثانية مع أهلها يقولون لها كلي تقول مابي مابي مابي

طلعت عيوزٍ مراهقهـ زعلانة تبي تاكل كشري لكن ماطاعوها أهلها وودوها بالغصب لميس الغانم الله يسامحهم

وشفت وحدة فاتحة المنيو العربي ومجمعة الويترز كل أبوهم اللي بالمطعم وتصارخ بصوت عالي هيّا بنا نترجم

فعرفت إنّها فري قيرلـ


قلت سبحان الله شنو هالصدفة العجيبة اللي جمعتنا كلنا بمكان واحد بنفس الوقت


يعني يا عيوف انتي وشلتك لا تقعدوون تسون فيها رومنسيات ترا حتى انا ودحووم رومنسسين ونحب بعض والدليل انه كل شوي مقردني معه بسسفرة من سفراته


بعدين انتم وش تبون الحين قاطين معي ؟؟

كل واحد يروح ع موضوعه يرد عليه ؟؟

يا حبكم للتجمعات يالشعب السعودي ؟