السلا م عليكم
هذا موضوع مره مهم وهي بنت ذاك اليوم تعلمني بسالفه ذي طبعا على المسانجر
وانا من الناس الي مايدخل ماسنجر الا شخص مترم وللفائده
يلله اخليكم مع كلامها:::::
من مدة شهرين تقريبا وحده من صديقاتي تقدم رجل شهم وشجاع لخطبتها <<<<< قلبنا مسلسل تاريخي خخخخخخخ
طبعا الكل وافق من اهلها
البنت طبعا ماتدري وين ربي قاطها فيه درت من اهلها وعرفت عنه كل شئ بس رفضت الرجال مدري ليه ؟؟؟؟
ومن كثر ما اهلها متمسكين بالرجال راحت البنت واستخارت عسى الله يكتب لها الخيره فيه
لكن سبحان الله ما ارتاحت للموضوع ورفضت الرجال
وظلت متمسكه برايها امام الكل
طبعا الولد واهله يوم تقدموا للخطبه قالوا لاهل البنت ولدنا جاهز بكل شئ
والرجال راتبه تقريبا 3500 ريال
اخو البنت وافق الرجال ماعليه وجاهز للزواج
اخو البنت ظن انه صافي الراتب اللي هو 3500 بيكون له يعني مصروفه الكامل منه ولاراح ينقطع منه شئ
الحمد لله 3500 تفتح بيت وتمشي الحال
وبعد كل الكلام اللي دار بين الاهل طبعا الولد طلب يشوف البنت نظره شرعيه وحصل وشافها
بعد ماشافها ووافقوا اتصلت ام الولد على ام صديقتي وقالت لها وش طلباتكم ؟؟؟؟؟
وهنا كانت الصاعقه ؟؟؟؟
ام صديقتي قبل تقول اي كلمه وقبل تقول شئ ,,,, حتى والله العظيم تقول ماكنت بطلب شئ ... كنت بقولها البنت بنتكم
قالت لها ام الولد ترى ولدنا بيطلع سيارتين من الوكاله ويبي يبيعها ومن الفلوس اللي بتيجه وبيدفع المهر وبيسوي الزواج ويبي ياثث الشقه وغيره
انفجعوا اهل صديقتي
اخوها انجن مايداني الديون والخرابيط هذي ,,, وكيف ان الرجال اول ماتقدم قال انا جاهز بكل شئ ؟؟؟؟؟؟؟؟؟؟؟؟؟؟؟
طبعا اخو البنت حسب كل شئ وشاف ان الحال بعد الزواج راح تكون بسيطه بسيطه جدا
وبعد هذا كله اخو البنت يبي يشتري الرجال
راح وكلم اخته وقال لها ترى كذا كذا وش رايك انتي
ادرسي الامور زين وشوفي
واذا وافقتي ما ابي ولد الناس يجي بيوم ويشتكي يقول اختك بغت واختك تبي
ولد الناس لاتوهقينه
تقول لي صديقتي بعد ماكان اخوي متمسك بالرجال اشوفه شوي صرف نظر
وهي بعد كانت رافضة بس يوم شافت تمسك اهلها لانت شوي
واتصلت علي وقالت لي وش رايك
طبعا اختكم المصون احم احم اللي هي انا سويتها سالفه وجبنا اوراق واقلام طبعا هذا زواج وعشرة عمر مهب لعبه
قلت لها خلينا نحسبها
لو بيطلع سيارتين يعني كل شهر بينقطع من راتبه تقريبا 1000 ريال ,,,, وعندك اجار شقه تقريبا في الشهر بعد 1000 ريال
وعندك مصاريف ومقاضي البيت 200 ريال وفواتير وغيره 300 ريال يعني المجموع 500 ريال هذا في حال كل واحد منهم مسك نفسه واقتصد
يعني طار من الراتب 2500 ريال بيبقى معهم الف ريال
وابوا الرجال متوفي الله يرحمه يعني لازم عليه انه يعطي امه مصروف كل شهر تقريبا 500 ريال
وش بقى معهم بالله 500 ريال !!!!!!!!!!!!!!!!!!!!!!!!!!!!!!!!!!!!!!!!!
500 ريال بتكفي مصروف له هو او بنزين للسياره او او او او او او ................................................
ومثلن لاسمح الله صار شئ بالشهر هذا وش بتكفي 500 ريال له ؟؟؟؟؟؟؟؟؟؟؟؟؟
وفيه طبعا مناسبات العيدين او صادف زواج ,,,, الرجال عنده خوات لازم عليه انه يعطيهم شئ ولو بسيط
حتى لو صبرت هي وياه على هالحال بكره امه تبي تشوف عياله ماراح تصبر من وين بتجيب مصروف للعيال من حليب وبامبرز وملابس وغيره وغيره ؟؟؟؟؟؟؟؟؟؟؟؟
وكل هذي الديون يبيلها على الاقل 3 سنوات او اكثر على ماتخلص
انا حاولت اجيبها يمين ويسار ماقدرت
قالت لي صديقتي خلاص ماتجي وش فيك انتي تقلبينها يمين ويسار
قلت لها ابي الفكه منك
تزوجي وفكي ازمه المجتمع منك
المهم ماكتب ربي نصيب وكلن راح بطريقه
صديقتي هنا قالت لامها قولي لهم ليه مااخذ من بنات عمه ليه طلع برى ؟؟؟؟
ويوم سالت امها نفس السؤال لام الولد وش تتوقعون ردت عليها ؟؟؟؟
قالت لها والله بنات عمنا مهورهم غاليه ,,, مايقدر ولدنا عليها
قالت لها ام صديقتي طيب وبناتك اخذوا عيال عمهم كم مهورهم ؟؟؟
طلع مهورهم نفس الشئ مرتفعه
انجنت صديقتي ,, قالت يعني انا اللي مهري ولاشئ
وش معناها ذي ؟؟؟؟
هنا انا هديت اللعب <<<<<<< داخله ملعب الاخت
وقلت لها البنت ماتنقاس بمهرها
البنت باخلاقها وسمعتها وسمعت اهلها الطيبه
المهم زبدة الكلام
ليه اغلب الشباب يمتع نفسه ويلعب ولاهمه شئ ويشتري اخر الماركات والجوالات واذا جابوا له طاري الزواج قال حالي حال غيري اذا جاء وقت الزواج رحت وطلعت لي سياره وبعتها وتزوجت
طيب مافكرت انت وياه وش بينتج بعد الزواج من ديون؟؟؟؟؟؟؟؟؟؟
والى متى هالديون راح تستمر ؟؟؟؟؟؟؟؟؟؟؟؟؟؟؟؟؟
مافكرت بالمرمطه اللي راح تصير لك انت وبنت الناس ؟؟؟؟؟؟؟؟؟؟؟؟؟؟؟
واذا صار له شئ بعد الزواج قال للبنت كله منك انتي بسبب زواجك وبسببك تراكمت علي الديون
طيب انت ليه مافكرت قبل ؟؟؟؟؟؟؟؟؟؟؟؟
ليه ماحسبت حساب انك بعد ماتتوظف راح تتزوج وبيكون لك بيت واهل وعيال وكلن له مصاريفه
والا انت تبي تتمتع وبنت الناس لاء
وربي ان فيه ناس تتوظف برواتب كبيره لكن تلعب فيها واذا جاء وقت الزواج طار لك يتدين ويتسلف ,,,, ليه طيب ؟؟؟؟؟؟
فيه واحد من جماعتنا ماشاء الله عليه من اول ماتوظف وهو فاتح له حسابين بالبنك
حساب واحد مايدري كم فيه على قولته الحساب المنسي
كلما استلم الراتب راح واضاف 1000 ريال من راتبه في الحساب المنسي ويتركه
واذا جاء الشهر اللي بعده وبغى يسحب الراتب يشوف كم بقى معه من راتب الشهر اللي فات حتى ان شاء الله لو هي 50 ريال يضيفها مع الالف
يعني لو كان يستلم 3000 ريال يسحب الفين له مصروف ,,,, والف ريال يحطها في الحساب المنسي على قولته
والشهر اللي بعده اذا بغى يسحب الراتب يشوف كم بقى معه من راتب الشهر اللي فات لو نقول بقى 100 يسحب من راتبه 1900 ريال
ويحول 1100 للحساب المنسي يعني مصروفه كل شهر لايتعدى الالفين والى الحين الرجال مايعرف كم معه في الحساب المنسي
ومايلتفت له على قولته الا اذا اشتدت عليه الامور وضاقت به الدنيا راح وسحب منه اللي يكفيه
وماشاء الله عليه يوم جاء يتزوج لاديون ولا خرابيط
تزوج وفتح بيت ومشى حاله على نفس الوتيره حتى بعد ماتزوج
والحين مهب قاصر عليه ولاعلى اهله شئ الرجال عنده عيال وحاله من احسن مايكون حتى وربي السيارات مايشتري الا من الوكاله واحسن السيارات وراتبه جدا عادي لاهو اللي يستلم ضربه ولاشئ ,,,
بس الرجال عرف كيف يحسبها وكيف يصرف ويوزن الامور
يعني المهم من هالبربره كلها الى متى وانتوا كذا ,,,, متى الناس بتفكر صح ؟؟؟؟؟؟؟
وفيه سالفه ثانيه <<<<<<<<<< ترى مطوله الاخت
الحين بعض الدول ماشاء الله عليهم تطورت اكثر مننا واحنا اذا تكلموا قالوا بندرس الوضع
وش تدرسون ؟؟؟؟؟؟
والى متى وانتوا تدرسون ؟؟؟؟؟
الناس تخرجت وقضت وهم الى الحين يدرسون
توني البارح اشوف التلفزيون واحدى الدول عندها القطارات السريعه مدري قطار الانفاق والدوله وربي من الدول العادية <<<<<<<< جلست تفكر من اي دول وفي الاخير كتبت عاديه الله يخلف بس
من الدول الاسيويه
طيب وش ناقصنا احنا ؟؟؟؟؟؟؟؟؟؟؟؟
هم عندهم ناس تدرس وتفكر واحنا لاء ؟؟؟؟؟؟؟؟؟؟؟؟؟؟؟؟
وربي انه فيه اشياء ومشاريع تقوم بالدول اللي جنبنا واحنا نااااااااااااااااااايمين ويبون يدرسون ؟؟؟؟؟؟؟
مدري من وين يبون يجيبون الناس اللي تدرس الموضوع شكلهم طالبينها طلبيه من الفضاء
التفتوا للاسهم ونسوا كل شئ
الله يصلح الحال بس
اقول اطس ابرك لي وازين لاني لو بكمل بجيب الكرسمس على قولت الملحوس
اتمنى انكم استفدوا من بربرتي شئ <<<<<<<<<<< ماعندك سالفه طسي بس
يعطيني العافيه
في امان الله
20 Aug 2005, 07:20 PM
موضع مرره خطير
العرض العادي
