|
قصيدة رووووووووعة إسمها (( خيااااانة )) . .
. . . . (( خـــيــــانـــــــــة )) . . . .
لا ردك الله لا ولا اطلب انك تردين . . . ادعي عليك بعثرة فـي صلاتـي
عثرة تشلك ما بعدها تقوميـن . . . يا قاتلتني يوم صرتي حياتــي
خدان لك بالقلب كانت بساتين . . . وريضان وغصونا بها يانعاتـي
كنتي مناة القلب والروح والعين . . . واليوم عينك يعلها ما تباتـــي
كنت أحسبك للعهد والحب توفين . . . قلتي الغدر بالحب ما هي بسواتي
وحلفتي يمين الله ما منك اثنتين . . . وانك ملاك دون كل البناتـــي
وانك على عهد المودة تسيرين . . . ولا تسمعين أهل الحسد والوشاتي
وصار اليمين ستار خلفه توارين . . . ورماح غدرك بالخفا مشرعاتـي
وبان الغدر سم جرى بالشرايين . . . الله عسى يسقيك سم الفعاتـــي
كلي سقيتك حب واليوم تنسيـن . . . تقولين حلم أيام واليوم فاتـــي
خذتي الهوى لعبه على ما تحبين . . . لين عصفت بالهوى عاصفاتـي
من زينك يا بنت بالشعر تزيين . . . من صورك بأبياته الطايلاتــي
انا من غرامي قلت كانك تذكرين . . . قلت الخجل صاب البدر من مناتي
وصرتي بشعري في العذا تباهين . . . تقولين أنا شمس العصر في حلاتي
زينتك بشعري ولا غربك الزين . . . ما زانتك صبغات حمر الشفاتــي
صورتك بالشعر حزام ورياحين . . . وأثرك هضاب وشوك ما به هداتي
رسمتك سحابه خير قطر تنفين . . . فزت لك الصحراء زهور ونباتـي
رسمتك مهاه للجميلة تقودين . . . وأثرك قطيعه وضيعتها الرعاتي
وأثرك غراب يوم سدل الجناحين . . . كنت احسب اني شايف لي قطاتي
بالشعر غليتك على كل غاليين . . . وأثرك دنيه وتعشقين الدناتــي
وبالشعر عاتبتك عتاب المحبين . . . أنا من يسوم الروح لك يا غناتي
توسلت لك خايف على حب عامين . . . عامين لكن في حسابي مئاتــي
ناديت لكن لي ابد ما تسمعين . . . عمري وروحي فكري في ثباتي
حذراك للشينات عمري تماشين . . . عديمات اصل اخلاقهن دانياتي
غاب الولي عنهن ولعبن بحبلين . . . يا خس واليهن وخس الولاتي
ما همهن في الناس زين ولا شين . . . وقلوبهن من حقدهن مظلماتي
وقلتي وربك لو يكونا ملايين. . . ما غيرن بالطباع هن من سماتي
تحسبين انك بالمهافه ترقين . . . كيف الصعود يكون للهاوياتي
وخنتي وبعتي كل عهد وايامين . . . ما عاد يفرق بين ماضي واتي
وصرتي مثل غيرك برخص تبيعين . . . يا مرخصتني ما بقى لك غلاتي
صبري نفذ واليوم ثارت براكين . . . مظلوم أنا وباكر تحل ادعواتي
سمعي عسى من بعدها ما تسمعين . . . سمعي دعا من صار قلبه حصاتي
ادعي عسى من ناضرك ما تشوفين . . . وتطحن بك الأيام طحن الرحاتي
وعساك عوق منه ما عاد تبرين . . . عوق تشافق له قلوب العداتي
ويالله عسى يحتار فيك المداوين . . . تبين الممات ولا يجيك المماتي
ويا لله عسى كف الندامه تعضين . . . تندمين يوم انه يفوت الفواتي
وتبكين دم يسيل من مقلة العين . . . وتحتار أمك عن عناك وتحاتي
عسى ما تلاقي من له القلب تهدين . . . وان هو حصل ادعي عساك الشتاتي
يا بلوة اللي وسط بيته تعيشين . . . ساهي وحوله شب جمر الغضاتي
عسى بعمرك ساعه ما تهنين . . . وتمضي حياتك بين هم وشقاتي
يا بنت قلبي وين مثله تلاقين . . . قلبا عطاك الحب ما قال هاتي
جيتك وروحي شلتها لك بكفين . . . وفي التاليه رمح الخيانه جزاتي
يالله عساك النار يا أم وجهين . . . كله انكشف لا ما تفيد العباتي
ويالله عسى تلبسك جن وشياطين . . . وتكونين مدعاة الحكي والشماتي
يا حية رقطا تقود الثعابين . . . باكر تحن ايامك لمعتماتي
وباكر على فعلك بمثله تجازين . . . ظلم المشاعر ما تحكمه قضاتي
بيني وبينك تحكم ايام وسنين . . . وانا شاهدي قلبا من الغدر ماتي
ويا دمعة التمساح لالا تذرفين . . . العيون رغم ادموعها كاذباتي
لا ما عرفتي الحب لا ما تحسين . . . وغدرك تعدى غدر ذيب لفلاتي
الذيب يعوي قبل يغدر بمسكين . . . وانتي غدرتي خافقي في سباتي
لو كان غدرك في كفوف الموازين . . . لكان رجح كل غدر البناتي
انتي السبب سقتي على القلب جرحين . . . غدر الغرام وموجع الذكرياتي
وانتي السبب واليوم لالا تلومين . . . وان جاك باكر شوفي اشلون يأتي
والله لاكتب وافضحك في دواوين . . . وارقص واغني يوم خبر الوفاتي
وارسم لاهل العشق قلبا وسهمين . . . وقصة خيانه ما روتها الرواتي
ويمين لانشر فوق اسمك عناوين . . . واشهرك من قاصي اليمن للفراتي
ومن غرب هالدنيا الى قاصي الصين . . . ديوان غدر فيه كل اللغاتي
والبادي اظلم سنة العين بالعين . . . والا فذي لا عادتي ولا صفاتي
ويا شبه انسانه برأس ورجلين . . . اعوذ بالرحمن منك بصلاتي
 . . . . وسلامتكم . . . .
|
اليوم
Sponsored Links
العرض العادي
