الله يالدنيا
قبل كم يوم رحت لستاربكس أتقهوى وأروّق ..
فإذا بي أشوف شلّة المتقاعدين حقت واحد اعرفه
اللي أصغر واحد فيهم عمره 45 إلى مالانهاية من الأعمار
سلمت عليهم من بعيد لبعيد وأخذت الكوفي حقي وانحشت..
وش لي ووش لسوالفهم اللي لها خمسمية سنة ماتغيرت
رحت أدوّر لي مكان ثاني أروّق فيه .. شوي ويدق علي هالواحد هذا:
-الواحد: إزيّك تال عومرك؟
-شنتر: نحمدو ياباشا ازيّك انتا؟
-الواحد: تمام التمام يافندم، انتا فين حضرتك؟
-شنتر: حضرتي شغّال ليموزين من غير زباين ، وحضرتك؟
-الواحد: حضرتي في ستاربكس تعالا نتأهوى..
-شنتر: ها؟ ستاربكس؟ طيّب
ورجّعنا الواحد الله يسامحه لشلته اللي مدري وش يبون من الحياة،
كل سوالفهم أسهم وعقار وعمار ودمار وسفر
قلت ياولد رح تونّس بهم شوي عسى الله يهديهم ويغيرون سوالفهم
وصلت وجلست معهم إلا ولقيتهم تطوروا ماشالله،
قاعدين يسولفون عن زمان أوّل،
عاد الدب الماهوب قطبي في الشلّة قاعدن يهايط على
الباقين وهو ماسك عصا
(تقل العصا اللي كان يشيلها أحمد الفهد الصباح في مباريات الكويت)
يعننّي كاش من زمان ويقول:
- من كان يدور بشارع الخزّان؟ من كان يدور بشارع
الستّين ذيك الأيّام؟ من كان ياكل ببوفيه مدري وشو بشارع الوزير؟
أقلق تاريخنا تقل محد كان يشرب عصير قصب ذيك الأيّام إلا
هو
عاد كل شوي يسألنا أنا والواحدد تذكرون فلان بن فلان؟
تذكرون المكان الفلاني؟ تذكرون مدري وشو؟
وحنّا : لا ، لا ، لا ، لا...
قلت له ياجدّي وش فيك نسيت إنك أكبر منّي بسبعمية سنة؟
ولا عشانك مفصّل ثوب جديد تقل ستارة غرفة النوم لوحدة حولا متزوجة أعمى؟
لا ومن زين الطبايع يلبس جزمة رياضة بيضا يعنني الدب
الشايب الكول المودرن البقمي اللي
أمشي كل يوم حول الحديقة لأقطف الأزهار
عاد عقب ماقمنا من شلّة الفراعنة ورحنا بيوتنا قعدت أهوجس بأيّام زمان الجميلة ،
أيّام كنا نسرح ونمرح في جنيف أنا وصديقاتي << احلف؟
وتذكرت أوّل يوم في أولى ابتدائي يوم أبوي كان صاحي من
النوم بالغصب عقب ما أزعجته أمّي قم قم قم ود الولد
للمدرسة بسرعة
ولبسوني بالغصب المريول << الثوب يبو الشباب وشو مريوله
ولبسوني الثوب والطاقيّة والسروال كان أطول من الثوب
وراح أبوي وهو معصب نطلني بالمدرسة
وراح وتركني ، وأنا ماغير أشوف المبزرة اللي يصيح واللي
يلعبون كورة بقواطي العصيرات ولاكنت أدري أنضم مع أي حزب
قمت رحت لواحدن لقيته بلحاله محتار في أمره حاله حالي وسألته: وش اسمك؟؟
ما أذكر اسمه صراحة لكنه قال اسمه وسألني مباشرة : انت ابوك خلاك وراح؟
خنقتني العبرة وقلت إيه وانت؟: قال إيه ..
عاد جو المدرسين وجمعوا الخرفان ودخلوهم الفصول وبدت الحياة الدراسية..
قعدت أقارن بين حال المدارس الحين يوم يدخل المدرس
ويطلع والطلاب كلهم يطامرون ويسولفون
ويضحكون وبين أيّامنا يوم كنا نشم ريح خياس المدرّس قبل
لايدخل الفصل نسكت كلنا
بلاهم الفلسطينيين والمصارية ماقصروا ، ياهم صفقونا تصفيقن صدزي
ولايهونون السعوديين اللي كانت أعمارهم تناطح الميتين
وعميان ويخلونهم يدرّسون،
قسم بالله لو نشوف الواحد منهم برا المدرسة حتى يوم
كبرنا إننا نسوي كذا ونقول والله مو أنا
و آخر مرة يا استاد لاشعورياً..
أما الحين مايطلع المدرس من الفصل إلا وثوبه كله عصير
وطباشير وألوان ،
وراسه أنواع الصعارير من صفقات الراس الخلفية أثناء
استئمانه أعدائه قصدي طلابه وكتابته على الصمبورة
لا ويوم يروح لسيارته يا يلقى القزاز مكسر ولا الكفر
مبنشر ولا البوية مكبوبن عليها كلونيا
كنا لاشفنا سيّارة المدرّس ندخل روسنا داخل ثيابنا
ونتلفّت نخاف لاتجينا صفقة قفا طائشة من هنا ولا من هنا
لا وإذا رجعت البيت تبدا الهواجيس باللّي البرتقالي
والعقال والمسطرة الخشب
والأب إذا دخل البيت كلّن ينحاش لغرفته لايجيه طراقن
طائش بسبب راعي الدتسن اللي حد أبوك
عند الإشارة وأدى إلى تعكير مزاجه
والأم تجي لمّه وترحّب فيه وتقول له تراني طبخت كذا وكذا
وكذا.. ويقول لها ماقصّرتي واليوم
بيجوني رجاجيل على العشاء وأبي شيّن يبيض الوجه..
وتقول له حاضر سم ابشر << مع إنها معزومة لكن
استحت تقول له دام إن عنده رجاجيل
وإذا قال يافلان تعال حضّر لو إنه كان عند الجيران .. وإذا قال
يافلان سوَ .. قبل لايكمّل الكلمة إلا
والموضوع تم ومنتهي..
ولاصار فيه عزيمة رجاجيل يقعد ماسكن الدلّة اللي تغلي
ويوقف فيها لين يشبعون جعلهم الطفح
الجلدي، ويكون أوّل من يحضّر في مجلس الرجال وآخر من يقلط على المفاطيح..
صراحة كانت حياة مظلمة
وسواليف الشيبان من أوّل كلها فلان بن فلان سوّى وفلان
بن فلان قال وفلان بن فلان مات وفلان
بن فلان جاه ولد ، طيّب أنا وش دخلني خلني أروح
أطقطق بهالأتاري شوي وأقعد أناظر القناة
الثانية يمكن يجي فيلم أمريكي بدون ألوان
أمّا الحين
إذا انعزمنا عند أحد وحنا قاعدين بالمجلس عنده.. طبعاً
القهوة والشاهي وعصير راني حبيبات
سيلف سيرفس.. هو يكفي إنه عازمنا ماقصّر.. لاويلعب
علينا يقول ياشباب البيت بيتكم عشان كذا
أنا ماخذ راحتي.. احلف؟؟
ويجيكم ولده من بعيد كااافخ ماشي مليار ومعه السيارة
اللي بالريموط كنتروط وهو يصارخ
باااابااااا << الله يالدنيا لو أحد درى في المدرسة إن الولد
يقول بابا نقعد نعايره فيها إلى يوم
الدين
ويرد أبوه هلا يابابا..
يقول له الولد: انت حمار ويضحك ضحكة انتصار وينحاش..
والأب يقول الله يهديك يابابا << احلف؟
عاد لاصار اللي عازم مدامته ماكانت موافقة على عزيمته
لربعه وزعلت وقالت له أنا بروح السوق
مع البنات وبنتعشى ونتقهوى وإذا راحوا أخوياك الملاعين
عطني خبر وإذا مارديت عليك ارسل
لي مسج وقل لي انهم راحوا عشان أرجع
لا وتخلي له العيال في البيت بعد ينتبه لهم
والولد بعد عشر دقايق من قولته لأبوه ياحمار يصرخ قائلاً:
بعاااابعاااااا
ويرد الأب: نعم يابابا؟
ويقول الابن الشطّور: فيني كااكااا << الله يالدنيا صاروا
يدلعون المسمّيات كنّها شي فخم
biggrin:حنّا كنّا نقولها صريحة بدون حواجز وألقاب
ويرد الأب: أوكي حبيبي رح للحمّام
وبعد ست دقائق يصرخ البزر اللعين: بعاااااابعااااااا تعال غسّل لي..
ويرد الأب: وشو ماتعرف تغسّل يابابا؟؟
يقول الابن المؤدب المتربّي: لعااااااااء تعال بسرعة فيه
ريحة << ريحة مين يامروح يامعفّن
والأب الحنون: طيّب طيّب يابابا جايك جايك
والأكل طبعاً من المطعم .. ولاّ بعد تبونها تطبخ؟؟ صاحيين
انتوا؟؟ نظام أمّي وجدتي هذا خلاااص
بح ياحلو انت ويّاه وش فيكم
محد قال له يعزم عديم المسؤولية والضمير أصدقاءه
القراوى اللي ماصدقوا خبر أحد يعزمهم
وقالوا تم ووهقوا الرجّال
وتقضى العزيمة وحنا ماسولفنا مع اللي عازمنا ولا كلمتين
على بعض.. كل مايروح شوي يناديه
البزر:
بعاااااابعاااااااا تعال حط لي سبستون
ويرجع لنا الرجّال يقول :
إيه وش بعد ؟ وش الأخبار؟ شلونكم ؟ عساكم بخير؟
شلون الشغل؟ شلون الأخوان والوالدين؟ عساكم طيبين
لين ننحاش عشان يرسل المسج للمدام وترجع تكمّل
التهزيء اللي بدأه الابن الشطّور
biggrin:
الله يالدنيا.. ويطالبون بحقوق المرأة بعد
والله هالمسيكين يبي له جمعية حقوق القرد ويالله ينصفونه
وش يبي ذا الموضوع ؟
معليش سامحوني الواحد لازم يفضفض شوي
واللي بيجي يعترض على عناصر ومحتويات ومقبّلات
ومفاطيح الموضوع يروح للشكاوى لأن
الموضوع غير قابل للمهاترات وقلّة الأدب يادب انت ويّاه ويّاها
11 Feb 2007, 03:16 AM
اللـــــــــه يالدنــــــــــياّ....تطورت مـــنـــفــوحهـ.... بعد انقطاع طويل عدنا اليكمـ....الله الله بالتميزٍ ولا راحت علينا ؟
رد: اللـــــــــه يالدنــــــــــياّ....تطورت مـــنـــفــوحهـ.... بعد انقطاع طويل عدنا اليكمـ....الله الله بالتميزٍ ولا راحت علينا ؟
