السلام عليكم

كيف الحال....ان شاء الله تمام

انا جيت اليوم و بصراحه في راسي

اشارككم في ايام رمضان<<يا ليل الليل ايش جابه ذا مو المفروض يكون مربوط مع الشياطين>>

سؤال يطرح نفسه....ايش اللي خلاني اروح للموت بيدي و ادخل علمي...؟؟

بصراحة شفت مع القسم هذا ويلات من القلق<<متعوب عليها الجملة هذي صح>>

يعني اتحدى احد يقدر يتحمل مدرس الE.R عني الانقليزي

تخيلوا معاي 4 حصص رسميه و 4 حصص اضافيه<<ترى رياض نجد مدرسة القلق كله>>

و اللي يزيد الطين بله

ان المدرس مصري و صوته يجيب النوم و الهم مع بعض<<مدري كيف تجي بس سواها>>

ولا يعطونا دروس بكتب من برى المدرسه و يقولون روحوا اشتروها<<القهر ان الكتب ما تباع الا في مكتبة جرير و جرير حقت صاحب المدرسه>>

و اذا خلصنا من الانجليزي

نروح للحصة اللي يوقف فيها العقل عن التفكير و تتوقف كل وظيفه في الجسم عن العمل

باستثناء القلب عشان ما نموت و اليد عشان نكتب<<على طاري الكتابه تدرون انا شاري للرياضيات لحالها دفتر 200 ورقه و خلص الى الان اكثر من نصه مع ان الورقه كبر خشم محشش رزه>>

حتى الرئه ما تشتغل عشان الاستاذ ما يبي يسمع ولا نفس<<اعرف سخيفه>>

و دروسها اغبى من الغبيه يعني فيه احد سمع عن شي اسمه الزمر ولا المصفوفات<<هذا الشي فااكين معه مدرسين الرياضيات بالعال كله و اسمه المصفوفات>>

نخلص من الرياضيات نروح لحصة الكيمياء اللي هي اغبى حصة او بالاصح اغبى

منهج بالعالم هو منهجها و انا ما راح اتكلم كثير لكن ابعطيكم مثال على الغباء

في اللي سووا المنهج

في ثاني اسبوع او ثالث اسبوع اخذنا بالكيمياء نظرية دالتون و طبعا يوم رجعت للبيت و نمت

و بعد ما طفش النوم من خشتي المصون راح عني و صحيت<<بالله ما اصلح فيلسوف>>

قمت اذاكر طبعا خلصت كل الدروس اللي درستها و رحت للكيمياء و اجلس على الدفتر

ساعه و نص عشان احفظ صفحتين و بعد معاناة ساعه و نص مع الدفتر و بعد

ما لعنت والدين دالتون قدرت احفظها و يوم رحت للمدرسه ثاني يوم و تجي حصة الكيمياء

خذينا الدرس اللي بعده و طلعت نظرية دالتون كل ابوها غلط <<وجه واحد مولع من القهر>>

وش رايكم بالحركه هذي

نخلص من الكيمياء و نروح للفيزياء اللي اسميها حصة المتعقدين و المتعقدات

طبعا انا ما ادري ايش يصير بحصة الفيزياء لأني ما افكر انتبه و عندي ثلاث حلول لا رابع لهما

اما اني آخذ شماغ واحد من اخوياي و انام و هذا حل او اني آخذ شماغ واحد من اخوياي و جواله و اجلس اكلم خويتي اللي بالجامعه ولاعب عليها و قايل لها اني ادرس بجامعة البترول<<والله لو درت جامعة البترول اني ناوي ادرس فيه كان قفلت ابوابها>>

او اني آخذ واحد من الدفاتر و اجلس اكتب اشعار و اشياء حلوه زي كذا

و بعدها ننتقل لحصة الاحياء اللي هي الحصة اللي مخليتي اصبر على العلمي

حصة الاحياء هذي متعة بس مو بسبب المنهج بسبب المدرس اللي يدرسنا احياء

يا ناس عليه اسلوب مو صاحي لو انت تكره شي اسمه احياء يخليك تحبها و رجلك فوق راسك



انا بصراحة انصح اي احد باول ثانوي ما يفكر يخش علمي ابدا

و انا ابعطيكم اشياء تخليكم تكرهون شي اسمه علمي

اولا عدد الحصص بالاسبوع:-
الرياضيات:6
الفيزياء:4
الكيمياء:4
الاحياء:4
الانجليزي:8 4حصص رسمي و 4 اضافي

ثانيا: نوعية المناهج تجيب الهم يعني سخيفه و لو ادور من اليوم لباكر مجال
اقدر استخدمها فيه ما راح احصل

ثالثا: انا ابعطيكم مثال لجدول يوم الاثنين في رمضان
طبعا الدراسة في رمضان 6 حصص
احياء_رياضيات_كيمياء_فيزياء_ نحو_english

و تصددقون بالايام العاديه يوم السبت و الاربعاء 8 حصص
و باقي ايام الاسبوع 9 حصص



انا تعبت من الكتابه و ابطع بااااااااي