يوم رمضاني سعودي((فوازير بالداخل))

واقف على رصيف · 02 Oct 2006, 03:50 PM

في البدايه كل عام وانتم بخير

وعساكم من عواده..

ومن العايدين ومن الفايزين ان شاءالله

مع تحيات التلفزيون السعودي

---------

في البدايه<<< كنك فليتها

أحب أذكر ان رمضان صيامه عباده<<< قل قسم!!

يعني مالها داعي النفسيات المخيسه على الظهريه ياللي تسوقون

---------

الساعه: 9 مورنينغ بتوقيت سراة عبيده

ابو منيره يرن المنبه حقه بصوت عالي جدا لدرجة ان الرجال قايم من النوم

وهو يسب ويلعن ويمسك المنبه ويمحطبه في أقرب جدار اللي هي مرته<< ياحياتي

مرته وهي توخر المنبه عن وجهها: يابو منيره صم ترانا أول يوم من أولها طقاق

أبو منيره يعطيها نظره يمينا بالله وانا اكتب الموضوع اني خفت منها الشي اللي خلا ام

منيره تظف وجها تحت اللحاف وهي عاضه العافيه

يدور ابو منيره على مفتاح السيدريك حقه وبعد ربع ساعه من اللعن والسب وترفيس

ام منيره عشان تقوم تدوره معه يلقاه بيده(من زود العوامه ماسكه في يده ويدوره )

يشغل ابو منيره السيديريك وبالأول بدون مايحمي وعلى الدوام

عند أول تقاطع في حارتهم واحد طالع في وجهه ويخليه يكع فرامل لين لصقت

جبهته في القزازه ويوم شالها لقا مكتوب على القزازه مخ مافيه

وبعد عشرين دقيقه طردي ورا اللي حده ينفقع الكفر عليه ويهج عليه الموتر

بس جت سليمه و فتحيه قصدي سلم ونزل وهو يسب ويلعن للمره المليون ويرفس

الشنطه وتنفتح المسكينه وطلع مع صوت الفتحه آآآآي من قوة الرفسه

يغير الإستبنه ويحرك الموتر وهو يقول كلمات نابيه ويوصل الدوام

أول مادخل المدير يناظر فيه بإستحقار لإن يدينه سود وثوبه مطبع عليه بأسود

من عقب ماشال الكفر ويزبد له جايني وسخ ومتأخر بعد؟!!!

أبو منيره توه بيسطر مديره بس تعوذ من بليس للمره الأولى وتذكر عياله

ومن بيكد عليهم ويتذكر كيف توسطوله عمانه وانه بيفشلهم و يمر مسلسل

الذكريات سريعا وقرر بعدها انه ينقلع على مكتبه

الساعه ثلاث ونص ابو منيره ماسك الطريق والنفس في المنخر وسيده على البيت

أول ماوصل يا......... وياااا....... وياللي فييييييك.......

=====(فاصل)=====

النقاط كلام مشفر ومايجوز أكتبه عشان ماأجرح صيامي ولا صيامكم وعلى

هذا جرا التنويه...

=====عدنا=====

طبعا الكلام كان موجه لأم منيره <<<يقالي بدخلكم جو رمنسي

جته طايره المسكينه وللأسف ناسيه ان شغالتهم ميري توها غاسله الحوش

وعلى طول جابت العيد في البلاط بزلقه محترمه لدرجة ان ابو منيره سوا حركة

زيدان عشان يوخر عن انبراشتها وراح يركض على باله مسجل هدف!!

حتى عياله الثلاثه فصخوا فنايلهم وجلسوا يشجعون

بعد مااستوعب الموقف ورجع لواقعه المخيس ألتفت على مرته خير ان شاء الله

لا يكون جالسه مع هالمبزره على سبيس تون وشايفه كابتن ماجد وجايه تطبقين علي؟!!

يالله بس قومي حطي الغدا!!

ناظرت فيه ام منيره وهي تمسح الدمان اللي تقوطر من خشتها بعد الطيحه:

هووووو هوووووووووو هوووووووووو!!!

أبو منيره ينحاش منها على باله انها كلب

قالت وش فيك؟!!

قال انتي قالبه بوليسي!!

قالت لا بس واخزيااااه ماصمتاااا؟!!

ابو منيره يتدارك الموقف: إلا بس بشوف انتي ذهينه ولا لا<< إفلقني

يدخل أبو منيره الغرفه وهو يتوعد ويهدد ام منيره لو ماتقومه قبل الآذان

ومايشوف السفره مليانه عن بكرة وبعد بكرة أبيها وأمها!!!

------

قبل الآذان

العائله الكريمه مجتمعه حول السفره <<< مصر أدخلكم أجواء بس هالمره عائليه

====فاصل====

تتكون عائلة ابو منيره من:

أبو منيره وهو الأب وأم منيره وهي الأم ومنيره وهي بنتهم<<< أقسم بالله ان الذكاء لعبتي

طبعا ماننسى باقي الطقم قصدي العائله وهم حصه و نوره

منيره في ثاني إبتدائي عايدتها مرتين

حصه توها داخله المدرسه وطبعا متأخره سنه

نوره آخر الطقم قصدي العنقود عمرها أربع سنين

======عدنا======

ابو منيره ماسك الريموت في يد والعرق في يد ويد تغير القناه ويد تمحط في البزارين

ام منيره نحفت خمسه كيلو خلال ربع ساعه من كثر ماتروح وترجع من المطبخ ياشايله يامنزله

ميري شغالتهم توها مركبه تقويم ومبسوطه فيه طاقه الإبتسامه في وجه ابو منيره مع كل تنزيله

لأحد الأطباق الشي اللي خلا ابو منيره توصل معه زياده على اللي هو فيه ويمحط الريموت في وجهها

مع الطبق الرابع عشر

باقي على الآذان دقيقه...

أبو منيره يصارخ بأعلى صوته هاااااااااه أذن؟!!!

البزارين في الحوش يخوطفون يحترون الآذان يذن موصيهم ابوهم

الذهين على باله مايسمعه وهو جالس في داخل البيت

وطبعا بصوت واحد لااااااااااا!!

وسبه ماشيه مليووووون في ام منيره بدون ان تقترف اي ذنب سوا انها

جالسه قدامه وساده نفسه عن الأكل على قولة ابو منيره وحط الحرره فيها!!! << كني فليتها

لحظة الصفر أذذذذذذن!!

البزاااااااااااااارين يصارخووون بأعلى ماعندهم أذذذذذذذذذذن يباااااااااااااااه

أذذذذذن ويدخلووون عليه وهم ركض وتصدم منيره في ميري اللي كانت جايه وشايله

العصير وينكب العصير ولا همها اهم شي توصل المعلومه وتبري الذمه وبكل ضمير

تصرخ يباااااااااه والله انه أذن انا سامعته!!!!<<< ترى من قلب طالعه الكلمات خصوصا انا سامعته!!

أبو منيره يزأر في وجه بنته قصدي يصرخ وليه وانا أصقه مااسمع؟!!<<ليه توصيهم طيب؟!!

بدت العائله تاكل ومع أول تمره أبو منيره يطلع الماربورو الأحمر ويفقع زقاااره ويكيف...

خذااااله موووش أليييم صقع في المخيخ ثمنيات من قوته!!!

وام منيره تناظره بربع عين طبعا نظرة إستحقار بس مو باينه تبي الفكه!!

حصه تنط وبكل براءة الطفوله اللي ماتعرف وجها: يبااااااه ابي سمبووووسه!!!

ابو منيره يصقع بالصحن في وجه بنته واللتي تقبلت الصقعه بكل سرور وكلت السمبوسه مبسوطه

ولا كأنها انصفقت ولا شي!!

اما منيره فشالت صحن اللقيمات ومسكت اختها نوره وجابت جوال ابوها وتعطيه امها وتقولها

يمممممه صوريني مع اللقيمات بوريها صديقاتي بكره!!!<<<< بعذرها تعيد ثاني

ابو منيره يحمد ربه مو على الأكل بس على مابلاه من حمير قصدي أطفال!!

بعد الفطور والصلاه...

أبو منيره ماسك الريموت في يد والزقاره في يد وفي نص الجلسه وجمبه مركا وبكتين ماربورو أحمر قدامه

وطفايه فيها ثمان زقاير مقضي عليها مع التحيه!!

ام منيره قدامها صحن كراث وصحن ليمون وصحن ملح وجمبها بنتها نوره مرتكزه كنها بتصور

ومنيره وحصه قدام التلفزيون منبطحين ورافعين رجليهم اللي وحده فيها شراب العائله

والثانيه مافيه...

=====تنويه====

لإبراءالذمه الشراب مشقوق من جهة الأصبع الكبير والأصبع ناط من كبره لو تحطون له عيون وخشه تحسون

انه بزر زايد منبطح معهم!!!

==انتهى التنويه====<<< يسمع بالتنويه

طبعا العائله كلها تحتري المسلسل المعروف واللي مابقا احد ماشافه واللي لو مانشوفه

في رمضان نحس اننا مو في رمضان واللي <<< أقول لا يكثر!!

جت الدعايات قبل طاش..

نوره وحصه ينططون ويصارخون دعايه دعايه حبك ماجد عبدالله!!!؟!!

ابو منيره يسف واحد من البكتات اللي قدامه في دمجة حصه واللي دمجتها غدت

كنها خريطه من كثر آثار الجروح من الهجمات اللي يشنها أبوها التتاري!!!!<<< معليش بس تحمست!!!

بدت أغنية طاش ماطاش...

البزارين الثلاثه هالمره ينططووووون من قلب ويغنون بأعلى أصواتهم ويرقصون طاااش طاااش طاااش ماطااااااش!!

ابو منيره اللي من جد طاااااش وانفقعت مرارته ويطلع ويجيب الزبيريه ويمحط عياله ويسبب لوحده من بناته عاهه مستديمه!!!

ام منيره تصاااارخ الله يهديك يابو منيره اجلس عااااد خلنا نشوف<<< مو خوف على عيالها

عشان مايفوتها عنوان الحلقه وبعدين تروح عليها مع السواليف مع الحريم بعد التراويح!!

تبدا طاش وتخلص وكل العائله تضحك إلا ابو منيره إلى يومكم ماادري ليه مايبي الضحكه تجي

على وجهه اللي كنه مقفى مكيف صحراوي!!!

قبل آذان العشا...

جوال ام منيره يرن وترد وهذه تفاصيل المكالمه:

أم منيره: هلاااااااا جواهر شفتييييييي طااااش ياخزييياااااااااه تضحككككك<<< وش دخل

ياخزياه ماادري؟!!

جواهر: هق هق هق<<< ضحكتها مخيسه!! هق هق هق كح كح كحححح عطووووني

موييييه!!!<<< شرقت من ضحكتها

ام منيره: بسم الله عليسسس ياوخيتي اكيد عين

====معليش غثيتكم بس فاصل للضروره من جد!!====

يعنبو بليسها ام منيره ماتعرف ترفع لإختها ابد ابد!!

وش ينظلون فيها جواهر عجرم؟!!!

عليها خشه كنها سبليت صاله لدرجة ان رجلها دايم يذب عليها يقول اهلك لعبوا علي عطوني

السبليت ولا عطوني الريموت حقه

حتى عيالها لين بغوا يرفعون ظغط امهم يجيبون مخاد وينبطحون تحت امهم ويقولون يمه بارد

لو سمحتي نبي نغط شوي

وحتى شغالتهم مره سألت ماما فين ضمان سبيليت مال إنتي

====عدنااا====

جواهر: إيه والله ياخويتي<<< مصدقه لين ألحين!!

ام منيره: يختي معاد يستحون طاش جايبين حرمه هالمره شعرها أشقر!!!؟!!

جواهر: إيييييييييه هالشينه اعوذ بالله من زينها عااااد والله انتسس احلى منها!!

ام منيره بعد ماكبر راسها: إيه مايخسى الا هي انا ازين منها!!

في هاللحظه ابو منيره كان يسمع الحوار ويوم سمع العباره الأخيره من مرته قام وطقها لين

عضت الأرض وطلقها طلقه وحده ومسك الجوال وتفل في وجه إختها وقالها لا تنسين تغيرين الفريون

ترى بديتي تطلعين حار ويصفق الجوال في جبهة مرته وينكسر وتنقطع المكالمه!!!<<انا مبسوط

لأنه برد حرتي

ويطلع وهو كالعاده يسب ويلعن في اليوم اللي اعرس فيه على ام منيره!!!

وام منيره تقوم مكسورة الجناحين وتدور البطاريه اللي كانت طايحه في مناخرها بس ماحست

فيها إلا يوم عطست و طلعت البطاريه وبكل عفويه تصرخ أشوااااا لقيتها!!؟!!

_____________

(فوازير الموضوع)

أسئله تنتظر من يجيب عليها بكل ذمه:

س1: كم مره سب ولعن ابو منيره في هاليوم؟!!

س2: مالأسباب اللي دعت منيره انها تعيد ثاني مرتين؟!!

س3: إلى متى وام منيره مفهيه؟!!

س4: نوره يوم كانت بتصور جمب منيره وهم ماسكين صحن اللقيمات وش كانت لابسه؟!!

س5: من هي الحماره قصدي البنت اللي جتها عاهه مستديمه من طق أبو منيره بعد ماكانوا ينططون

ويغنون طاش؟!!!

س6: إذا عرفت أن منيره في ثاني إبتدائي وعايدتها مرتين وأن اختها حصه في أولى إبتدائي

ومتأخره سنهفكم هو عمر نوره لين تخرجت من ثاني متوسط؟!!!

اتمنى ان تجابون على هالأسئله الخفيفه وترسلون الإجابات في الرسائل الخاصه وستكون هناك

جائزه لأفشل إجابه عباره عن صحن لقيمات وصحنين سمبوسه وحده جبن ووحده لحم مقدمه من

أم منيره شخصيا!!!

----------

(لمن يريد أن يكسب ثواب في هالشهر الفضيل)

لأصحاب القلوب الرحيمه...

من يتكفل بعلاج حصه من التشوهات اللتي لحقت بها من جراء حرب أبوها المتواصل عليها؟!!

يبيلها عملية تجميل طبعا في معمل جغرافيا عشان يعدلون الخريطه اللي وجهها

وكل عام وانتم بخير وسلامه وفتون

تقبلوا تحياتي...