آدم وحــوآء تعـآلــــوا هــنآ آبـــيكــم لاهــنــتـــو

خكاريه سوو مظاهره ضد اسرائيل .. شايلين لافتات مكتوب عليها ..
"اسرائيل بس خلاص جد جد جد مصختوها" .. !؟


عاد هالفتره الشهر المجاني للرسائل قسم ماوقف جوالي حتى تالي الليل نكت
ياحليلهم شعبنا قسم انهم وسيعين صدر وخفيفين دم بس الماده شوي ماساعدتهم

نجي عاد للجد والجد الله فيه

اولا :احب ابارك لااختي الحبيبه والغاليه غدشدش افتتاح القسم واقول جعله قسم(ن) عامرن باهله وزواره

والشي الثاني ماحبيت اجي اسلم ويدي فاضيه فجبت لتس معي هالهديه المتواضعه ياخلف قلبي

سمي





وشسمه وجبت هالموضوع من بنات افكاري وعساه ينال على اعجابتس واعجاب الاعضاء

نقول وبالله التوفيق

ترى انا بنت مابعد اعرست ولاادري وش بيكتب لي ربي
عسى مايطيح في تسبدي علتن مدري شلون اجاريه

بس قلت يابنت بدي العصابه قبل الفلقه وثقفي نفستس وكثري من هالمواضيع الزينه
واللي تفيدتس وتفيدين بها غيرتس ====>يحلفون ان نص
مشاكل مدرساتهم المتزوجات عندها من كثر ماتشور عليهم وتفلسف

طبعا موضوعي هذا لكل الطرفين ادم وحواء
خلنونا نبدا براس الحربه

آدم يا آدم

انت ابي واخي وانت ابني وزوجي ==>
انت النصف الاخر المكمل لي
ولولاك ماشقيت طريق الحياة لوحدي==> اهنيتس ع الفصحى

انت الغصن وانا العصفوره انت البحر وانا الشاطي
انت البستان وانا ورودك الملونه
انت من احس معك بانوثتي

رجولتك وحنانك ودفا مشاعرك تشعرني اني اسعد امراه في الكون
حياتي لاتكتمل وابتسامتي لن تكون اجمل الا بقربك

انت فقط من احتاجه
انت الصدر العطوف
انت القلب الحنون
بك استمد قوتي

فلماذا تستقوي علي يارعاك الله


للاسف صارت اغلب جلساتنا واجتماعاتنا عن مشاكل الازواج
عاد انا احتكاكي اكثر بحكم اني بنوته مع الجنس اللطيف والله اسمع منهم سوالف
تخليك تكرهين شي اسمه زواج

ياتشتكي من تقصيره واهماله وسهراته برى البيت!!
واذا كانت موظفه من عبئ الوظيفه وانه محملها مسؤليه البيت والمصاريف ضريبه هالوظيفه!!
والا متزوج عليها ومبسط عمره وهي صاكن عليها البيت مع عيالها والنفس شينه !!

والا تشتكي لك من قلة رومانسيته وانه جفس وطبعه عنيد ومايعجبه شي وكلمته ماتنثني!!
وانها تزوجت وهي صغيره واهلها ضغطوا عليها والا العادات والتقاليد والا والا ....
اشياء كثيره تخلي البنت تعزف عن الزواج
ياترى العيب في مين ؟؟

في طبيعة الرجل اللي ماقدر يستوعب صح حاجة الانثى له ؟
والا انه يتوقع اكتمال الرجوله في العنف والشده وكلمة لا في كل شي؟

اوانه يستحي قدام اهله وربعه عشان مايقولون زوجته تمشيه على كيفها ؟مثل مايعتقد البعض؟
والا عدم قدرته على تحمل المسؤوليه وفتح بيت وزواج واولاد ..الخ ؟
والا انه قالب لها البيت قصر افراح وكل يوم عازم فلان وموجب فلان وهي ياحيل الله متحفيتن رجليها من الكرف!!
او انه بخيل ومايعطيها حتى شغاله ماجاب لها مع ان البيت كير والعيال كثار والمسؤوليه عليها كبيره
مدري بالضبط الخلل وين ؟ ومن مين ؟


نجي لحواء

حواء ماعليش هالمره بكون منصفه منيب واقفتن معتس يابعدهم

اكثر مشاكل الازواج اللي اقراها واسمعها

*انشغال المراه عن زوجها والاهتمام فيه بالاولاد او الوظيفه؟
*قلة نظافتها سواء ببيتها او عيالها
*التقصير بخدمه زوجها من اي ناحيه سواء نظافه او لباس او اكل او فراش ..الخ
*عدم اهتمامها بنفسها من ناحية الجسم واللياقه وتاركه عوامل التعريه تلعب دورها
*كثرة طلباتها اللي ماتخلص هات وماعندنا والله يخلف علينا وام فلان احسن مني وابو فلان جاب لفلانه وانت ماجبت؟

*عدم تغير روتين الحياه اليومي سواء بشكلها او بالمفاجآت اللي ممكن تفاجئ فيها زوجها او حتى بأثاث البيت
*اهمالها لزوجها من ناحية التقرب له والاستماع له ومحاوله تقديم بعض الحلول للصعوبات اللي ممكن تواجهه بشغله او حياته العمليه
* تقصيرها من ناحية الحب والرومانسيه وتمجيده واعطائه حقه من المشاعر والحب والتقدير والاحترام
*مبالغتها في متابعه اخر صرخات الموضه والمطامر بالاسواق وعدم الجلوس بالبيت ومتابعه الاطفال وحسن الاداره والتنظيم
* الجلسه الطويله اما م القنوات الفضائيه والاعتماد بشكل كبير على الشغاله في اداره البيت والاولاد والطبخ

طيب بهالحاله وش الحل برايكم

انا ابغي ادم وحواء يتواجهون ويتكلمون ويطلعون بنتيجه مرضيه
نبي حلول مقنعه تخفف من حدة هالروتين والملل اللي وصلت له اكثر العلاقات الزوجيه
وبالنهايه للاسف الكثير منها انتهى بالطلاق

ياريت تتحفونا بأرائكم وتشاركونا
وتذكروا الاعتراف بالخطاء فضيله من كلا الطرفين والكمال لله
يارب قدرت اوصل لكم الفكره من موضوعي


انتظركم
ارق واحلى تحيه

بنت الشيوخ


شسمه

غدووووش سجلي لي اسماء المشاركين بالموضوع
ناويتن اشرههم اخر الموضوع===> وش عندها حصه الشعلان