السلاااااااام عليكم ورحمة الله وبركاته..



اول ماخذت الجامعه طاااااااايرن من الفرحه اني تخرجت . ومانتبهت للمعدل ! ولا انتبهت لتخصص !


وادخل على امي اول الضحى . مامااااا ماماااا <<< مسويلي متخرج بكرليوس طب الا قل حلب بقر وتيوس


وهي الله يخليها تقطع وتهذي الطماط والبصل!! ( غيرنا تطمر وتزغرد و ....الخ )

... واحب راسها واجلس جمبها .يالله ياحصيصه يالله يام دحيييم يالله افرحي واستانسي ولدك تخرج


يمه اذا توظفت وبغيت اتزوج من تخطبين لي ؟ هم جيراننا مهوب عندهم بنت <<< طلع الفضايح الي براسه



وهي تناظر بطرف عين . وتقططططع . اقول صف شهادتك مع شهايد اخوانك بالمكتبه و قم غير اسطوانات الغاز ولا توجع راسي.


واقوم وادربي الاسطوانات واركبهن بشنطة السياره الا وذااك الجلنط !! اووو وائل<<من اسمه تدري انه ولد نعمه


طااااق هاك الجنز ... ورافع لصوت رامي عياش وراسه يلمع من الجـل ..


هلاااااا وائل وش هالموتر ماشاء الله ! ... والله يالكافخ هالهمـر هديه من امي عشاني تخرجت



وابوي بياخذني معه لاسبانيا زي العاده . وانا مواعد عيال عمي نروح لباريس والا جنيف


( وبهالحظه انا اهوووجس ... هالحين مدري وشلون ابدبر قطه كشته خميس وجمعه لثمامه ؟ ووائل مايبي يروح لسبانيا و .. )


وقالي . هاااااه وانتم وين بتروحون بهالصيف ؟ انا .. امي تقول نبي ماليزيا وابوي يقول لا بنرووح الا غصصصصصصب لندن

وانا بيني وبينك مليت من لندن وجوها .

وهو الي يلتفت على عتبه بابنا هالمكسره وكانه يقول بنفسه دام هذا بيتكم ماضن تتعدون تفتيش خط القصيم


الا ابقولك ياوائل وش بتسوي من ناحية الوظيفه .. والله مدري وين اروح ؟ خالي بالاتصالات وعمي بمجلس الشورى وعمي الثاني بوزارة الماليه و


والله مدري وش اختار .. بس خل يقضى الصيف اما اتوظف والا اجلس مع الوالد بالشركه .

وانت يالكافخ وش بتسوي .. اقول ماتسلفني احد خوالك لو يوم ؟ هااااه وش قلت ؟


لا بس اقول انا بعد محتااااااار ادخل كلية الملك فهد الامنيه والا كلية الملك فيصل الحربيه ؟


والى متى بنصير واقفين عند الباب ؟ اقلط خن ناخذ فنجال قهوه ..؟

ابد ابد والله مستعجل .. اقلللللط يابن الحلال اقل شي اذا مرو الناس وشافو الهمر عند بابنا قالو وش هالمطخطخين

نبي نشخص بموترك ... ههههههههههههههههه ولا يهمك بس وقت ثاني


يالله باااااي << كذا الاتكيت بااي مهوب يالله انقلع خل اشوفك اليوم

الله يستر عليه وائل .. ماشاء الله عليه .

واغير الاسطوانات وارجع للبيت ..

وعلى هالحاله .....

وتمر الايام والايام ويقضى الصيف وحنا ماسافرنا الا لشرقيه ومن زين الطبايع جلسنا يوم ظايعين بالخبر


وعلى هالحاله ... والدجه والطفره ... والجوال مقطوع .. والبانزين فاضي ..


ولا وظيفه ولا شي .... طفح الكيل . وطالت الشوشه وشانت النفس على التفكير و الاحلام الضايعه( بنت الجيران )



الخدمه المدنيه .. مااااافيه ووظايف ومافيه تقديم ... الشركات لازم تشتغل اول شهر تجربه و بلا راتب !!


الى ان صفت الفكره على وظيفه عند محل الخضار الي باخر الشارع .على فكره بحارتنا حتى الصيدليه تبيع جح .



وقالي ابو علـي راعي المحل .وش معك شهاده ؟وترا لازم شهادة الثانويه ولازم يصير معك لغه ايطاليه !يقول عشان فيه تفاح ايطالي !!



ولازم يكون معك رخصه عمومي . وشهادة حاسب اقل شي ست اشهر !!

عاد انا قلتله !! بعد وش رايك ماتبي عصير تووووت بعد ؟ والاما تبي جيب ربع ؟


انا مقدم على ارامكو والا الكونقرس الامريكي ؟ انت ومحلك هالي كنه بنشر


و رجفت سطول الخضار .. قلتله .. لا لا .... انت ياخطير خلاااااص التوبه يابو شهااااب .


الا وش رايك ؟ تعال اضربني احسن !! لا لا تعال !! يابابا لا تنسى انك مشغل عامل اجنبي بالمحل .


يعني لو اشكيك للبلديه اخليهم يجروونك مع قرعتك انت وخشمك هالي كنه قفل بنك الرياض .


وللمعلوميه تراكم متلاعبين بالميزان ومخليه يحسب الكيلو كيلو ونص .... واطلع من محله


من القهر قام من كرسيه ورجمني بموزه براسي اخذتها طبعا زي العاده مانعاف شي ببلاش .


رجعت للبيت . ورجع لي الطفش وهمي هو همي ..


سهر ونوم الى الظهر وملللللللللللل الواحد يكره نفسه . لا ليله ليل ولا نهاره ظهر .....


وبالنهايه اقدم عند امي بواااااسطه من خالتي . بوظيفه معقب ومندوب للمخابز والبقالات وعلى بند 103

وعشانها امي وبالواسطه وظفتني بدون شرط اللغه والخبره وبدون الكشف الطبي .....





الفوائد ....




1- لاتنصدم بردة فعل امك عند سماعها لاخبارك المفرحه خااااااصه وهي مشغوله بالبيت


2- مد عصاقيلك على قد خلاقينك . ولا تناظر فوق توجعك رقبتك.


3- مهيب شينه تقلب بيتكم كراج لانواع السيارات الفارهه ( الدعوا تشخيص )


4- حتى راعيين محال الخضار صارو يتشرطون !!


5- الجنه تحت اقدام الامهات .. حتى لو ماحسيت منها بشي مباشر .


6- ععععععض على اي وظيفه لو هي تلبيق طيارات مطار الملك خالد .


7- اللللللللله يعيين العاطلين والعاطلات ويرزقهم الوظايف السنعه ... اولهم عتالا في رجه





انا والله اني عارف اني طولت السالفه بس تعرفن باجازه وانواع الفراغ.


و هذي حاله مشابهه لشخص اعرفه صورتها ولمصصصقتها وبهرررتها وبالمايكروييف لين طلعت بهالقصه


واااااااااسف على الاطاله .