يايمه جيت ابسأل ليه انا حظي مجافيني اشوف الناس ماتمه وانا ما بين حسراتي ...

اشوف افراح من حولي اسلم ما تحييني اناديها وانا خجلان الزم في تحيـــــــــاتي ..

احاكيها يافرحه وين ؟؟حلفت انك تزوريني اشد بحكي ثم ارخي اداعبها بهمساتي..

ولا به فايده يمه برغبتها تمشيني تواعد ثم تخلفني او انها تنسى اوقاتي...

انا اذكر دعوتك لله..طلبك انه يخليني طلبك انه يرزقني و يوفقني في بداياتي...

تعلمت الدعاء منك وصارت عاده فيني اذا نامت عيون الخلق اوجه لربي دعواتي ..

رجيت بصوت كله خوف متأمل بيعطيني لاجل ما افرحك يمه رجيت وزدت رجواتي...

هقيت ان دنيتي تصدق بدعواتي وتوفيني صبرت بحروة امالي وحروة كل هقواتي ..

وجت للخلق ذا كله ارزت تجيني وقلت اكيد هي خيره حمدت الله لحالاتي ...

كتمت الآآآآه لا تطلع ولا ودي يتعبك نوحي ولا تشقيك شهقاتـــــــــــــــي ..

تجرعت الالم يمه شربته بأول سنيني وجيتك ما بغيت انك تحسي مر لوعاتي...

اضحك هم دمعاتي واطمن خوف يحويني واجر بصوتي العالي لاجل عينيك ضحكاتي..

واذا صديت عن وجهك اسلم امري لعيني تجيني مثل جلاد يروق ان شاف دمعاتي..

اجملها بذكر الله واقول بيجزيني اهدي نفسي اطلبها تجملها ببسماتي..

ولكن لو نجى للجد ترى كذبي مأذيني ما عاد استحمل العيشه بتزيفي لفرحاتي...

انا هلكانه يايمه انا تعبانه ضميني انا كل ليله اتوفى وارد احيا لصرعاتـــــــــي...

ذبحني البرد يايمه بغيتك لو تدفيني طلبتك انزعي برد سكن واستوطن بذاتي..

ضلوعي تزاحمت يمه بصدر ما يكفيني من الضيقه من همومي من الامي واهاتي..

يلاعب فكري جنون وتلاعبني شياطيني توريني تذكرني بمعاناتــــــي...

تشككني بحبك لي واقول انك تحبيني تعاند حبك بقلبي تكذب لي حكاياتي ..

ترى ماهزني خوفي وحبكلي بيحميني ترى ماعمري اشكك والومك في نهاياتي...

انا بس ابسألك يمه حقيقه ليه ولدتيني ؟؟بنفس اللحظه يايمه ولدتي لي وناتي...

ارد ادعي انا ربي من العله يشافيني وكل خوفي على قلبك اذا مروك برفاتي..

انا خايفه من احلام نهايتها بتشقيني ومن قسوة مشاويري ومن اخر مسافاتي...

وخايفه والله من قبري ومن تربه تغطيني وسيرة تنقطع بعدي ما يبقى غير كلماتي..

ابيكي ترضي بالقسمه ورضواتك بيرضيني تراني لاجلك اتمنى يحقق ربي رغباتي..

يايمه لا اشوف الهم بوجهك لا تبكيني ترى مكتوبه قبل اولد متى ولوين خطواتي ...

واذا ما جت على كيفي ابيكي منها تعفيني ابي ترحمني دموعك وتشفع عندك ابياتي..