تيتي تيتي زي ما رحتي زي ماجيتي !!

يعني فينهم خلال فترة الإجازة الصيفية

إدارة الصيانة في إدارة التعليم

ما هو كفاية المدارس شقق في عمائر مستأجره

لا يسكنها حتى الحمار الأعرج

وكمان بعد فتح المدارس أبوابها يروحوا الأولاد والبنات عشان يدرسوا

 تلاقيهم راجعين بقصص وحكايات كيف نظفنا المدرسه بثياب جديده 

شوفوا أبو فتوا إيش قال

 

مغني جنب أصنج

 

  فتحي حلواني

 

سلام يا حبايب وجمعة مباركه عليكم.. الاسبوعين اللي فاتو ما انتشرت المقالات بسبب الإعلان والحبايب المسؤولين عن عكـاظ الأسبوعية ما عندهم إلا (ابو فتو) يشوتوه بره الصفحة وزي ما بيقولوا حكم القوي على الضعيف، عشان كده حبيت يكون عندكم خبر والله يعينني على المناحله اللي بيني وبينهم، المهم لا أطول عليكم وخلوكم معايا في هرجتنا اليوم..

 أنا ماني عارف اليين متى ونحنا نسمع ونقرأ تصاريح المسؤولين عن التعليم أنه كل شي عال العال وان شاء الله ما يبدأ العام الدراسي الجديد إلا كل شي على سنجة عشره زي ما بيقولوا اخواننا المصريين، لكن الحكايه أنه ولا شي من ده صار ومن يوم ما بدأت الدراسه انكشف المستور وخلينا نخش في المستور على الله الحبايب اللي في التعليم يشوفولوا حل..

أكيد انتو عارفين انه إجازة المدارس بدأت قبل 4 شهور والمدارس فتحت ابوابها الاسبوع اللي فات (وتيتي تيتي زي ما رحتي زي ما جيتي) لأنك لما تدخل بعض المدارس تلاقيها زي ماهيه الصيانه اللي فيها لسه ما انتهت البطحاء والاسمنت والبلاط مشعتر وتلاقي المعلمين والمعلمات والطلبة والطالبات شغالين تنفيض في ملابسهم من كتر الغبره اللي بهدلتهم واللي خلتهم كانهم خارجين من قبور، هدا غير ريحة البويات اللي كتمت انفاسهم وجابت خبرهم وربنا يستر لا يروح يطيح عليهم سقف والا جدار لكن ايش نقول الا الله المستعان ولاحول ولا قوة الا بالله هدا ادا عرفنا كمان انه نظافة بعض المدارس كانوا يقوموا بيها المعلمين والمعلمات يجمعوا (القطة) ويجيبوا عامل عشان ينظف المدرسة، هدا غير انه في مدارس من غير مدرسين ولا مدرسات لانه الوزارة بتقول انه في عجز في الكادر التعليمي

تعرفوا قد ايش العجز في وزارتنا العزيزة انا اقولكم العجز اللي في الوزارة بس خمسة آلاف معلم ومعلمة شفتوا كيف ونحنا عندنا اكتر من خمسة الاف معلم ومعلمه مستنيين بس اشارة من الوزارة عشان يتوظفوا وياكلوا لقمة عيش ومنها كمان يسددوا العجز اللي بتقول عليه،

هدا غير انه اغلب المدارس سواء اولاد او بنات لسه ما استلمووا الكتب وادا استلمووا الكتب ما يكون عندهم جدول وشوف عاد طلاب وطالبات الابتدائي تلاقيهم المساكين متعتليين اكوام من الكتب اللي تكسر ظهورهم هدا غير انه بعض المدارس وبسبب الصيانة اللي فيها نقلوهم لمدارس تانية والداوم يبدأ فيها الساعه 11 قبل الظهر لانه في مدرسة قبلها في الصباح وشوف عاد هجولة وبهدلة ابهاتهم في المشاوير يخرج من شغله عشان يوصل اولاده او بناته واذا خرج من شغله اتعطل عمله واتبهدلوا المراجعين وجالوا حسم نهاية الشهر بسبب خرووجه من دوامه هدا ادا عرفنا انه رب الاسرة دي من حبايبنا الغلابا اللي (يومه عيدوو) وبعدين انا ماني عارف فين المدارس الجديدة اللي قالوا إنهم حيفتحوها السنة دي وعيشووا كتيييير تشووفوا كتيييير.